Таатта улууһугар дьоҕурдаах оҕолору сайыннарар бэртээхэй бырагыраама үлэлиир

“Дьоҕурдаах оҕолору сайыннарыы” Таатта улууһун муниципальнай тус сыаллаах бырагырааматынан алтынньы 11-16 күннэригэр улуус оскуолаларын 38 бастыҥ үөрэнээччитэ Москваҕа Бүтүн Арасыыйатааҕы НАУКА 0+ билим бэстибээлигэр кыттан кэллилэр.

Бастакы күн Кыһыл болуоссат тулатыгар, «Москва-Сити» уонна М.В. Ломоносов аатынан МГУ фундаментальнай бибилэтиэкэтигэр бэстибээл аһыллыытыгар сырыттылар. Оҕолор билим эйгэтигэр тута киирэн, олус элбэх саҥаны-сонуну билэн-көрөн саҕалаатылар.

“Бу Таатта улууһун “Дьоҕурдаах оҕолору сайыннарыы”  муниципальнай тус сыаллаах бырагыраамата ыччат билимҥэ тардыһыытын, билим кыаҕын сайыннарыыга туһуланар, — диэн кэпсиир үөрэх управлениетын методическай салаатын начаалынньыга Мира Луковцева. — Алтынньы 15 күнүгэр СӨ Бастайааннай Бэрэстэбиитэлистибэтин дьиэтигэр Москва бастыҥ үрдүк үөрэҕин кыһаларыгар үөрэнэр устудьуоннарын, выпускниктарын кытта көрсүһүү буолбута. Онно устудьуоннар Москваҕа хайдах үөрэнэ сылдьалларын, үрдүк үөрэҕи манна ылыы төһө кыаҕы биэрэрин кэпсээтилэр, оскуола эрдэхтэн сыал-сорук туруоран үчүгэйдик үөрэниҥ диэн сүбэлээтилэр. Оҕолор Москва ВУЗтарыгар киириини, хайдах үөрэтэллэрин, устудьуон олоҕун интэриэһиргээн ыйыталастылар. Маннык сырыылар эдэр чинчийээччилэри үрдүккэ көҕүлүүллэрэ, инникитин билиминэн дьарыктанар баҕа санааларын күөртүүллэрэ биллэр”.

Төрөппүттэр махтал тыллара бу маннык быраактыка оҕолорго олус үчүгэйдик дьайарын туоһулуур: “Москва куоракка улахан тэрээһиҥҥэ, араас биллэр миэстэлэргэ илдьэ сылдьыбыт бары салайааччыларбытыгар, Мира Николаевнаҕа улахан махтал тылларбытын тиэрдэбит. Оҕолорбут олус интэриэһиргээн, күүлэйдээн, сынньанан, киэҥ сири көрөн үөрэн-көтөн кэллилэр, элбэҕи биллилэр, көрдүлэр”.

“Салайааччыларбытыгар Мира Николаевнаҕа, Инна Аркадьевнаҕа, Петр Васильевичка, Владимир Владимировичка ис сүрэхтэн  барҕа махтал!

Бастатан туран, салайар үлэ үрдүк таһымнаахтык, былааннаахтык ыытылынна. Ол курдук, ыам ыйыгар Москваҕа билим бэстибээлигэр бараллара биллэрин кытта субсидированнай билиэккэ тиксиини, оҕолору тэрийэн ыытыыны барытын кэмигэр оҥороннор, төрөппүттэри олус абыраатылар. Субу курдук тэринии — кыайыы!

Биир эмит оҕо соҕуруу баран үөрэниэм диэн санаалаах кэлбитэ буолуо. Араас историческай уонна аныгы сирдэри көрдөрөн, билиһиннэрэн илдьэ сылдьыбыккытыгар МАХТАЛ. Оҕом олус астынан кэллэ. Үлэҕит үүнэ-сайда турдун!

Мира Луковцева кэпсээбитинэн, билим бэстибээлин иннинэ Москваҕа 1 №-дээх Ытык Күөллээҕи орто оскуола юридическай хайысхалаах кылааһын оҕолоро үөрэнэн кэлбиттэр. Москватааҕы педагогическай судаарыстыбаннай университета оҥорбут бырагырааматынан РФ Үрдүкү Суутун, РФ Госдууматын үлэтин билсибиттэр, РФ ИДьМ Киин Түмэлигэр, Поклоннай хайаҕа Кыайыы пааркатыгар, МПГУ кылаабынай куорпуһугар сылдьыбыттар, Суут бырассыаһа” имитационнай оонньууга, “Биисинэһи үбүлээһин источниктара” дьыалабыай оонньууга, “Конституционнай тутул төрүттэрэ” интерактивнай дьарыктаныыга кыттыбыттар.