Таатта улууһун баһылыга кыстыкка киириини билсэр

Бу күннэргэ Таатта улууһун баһылыга Айаал Бурцев нэһилиэктэринэн сылдьан кыстыкка киириигэ олох-дьаһах хомунаалынай хаһаайыстыбаларын үлэлэрин кытта билсэр. 

— СӨ ОДьКХ Тааттатааҕы филиалын салайааччыта Василий Будикин, тыа хаһаайыстыбатын управлениетын салайааччытын солбуйаачыта Григорий Таппыров буолан, Уус Тааттаҕа  тахсан үлэлээтибит. Алдан нэһилиэгэр дьаһалтаҕа оскуола дириэктэрин, уһуйаанын сэбиэдиссэйин, нэһилиэк актыыбын кытта көрсөн дьиэлэргэ ититии холбонуутун, оскуола өрүмүөнүн боппуруостарын ырыттыбыт.

Билигин кыстыкка киирии кэмигэр итиигэ холбонуу сүрүн боппуруос буолар. Ол курдук, быйыл Уус Тааттаҕа 80 дьиэ киин хочуолга холбонуохтаах.

Уус Таатта оскуолатын дириэктэрэ Гайдар Винокуров оскуола өрүмүөнүн, уһуйаан тутуутун ыйыталаста. Оскуола 2007 сылга тутуллубутуттан өрүмүөнэ суох турар. Маны биһиги бэркэ билэбит, сөптөөх бырайыак оҥорон, федеральнай бырагыраамаҕа  киирсэргэ сүбэлэстибит. «Силис» СХПК салайааччыта Валерий Постников баар кыһалҕаларын кэпсээтэ, кэлэр сылга үлэтигэр былааннарын кэпсэттибит.

Билигин тыа хаһаайыстыбатын салаатыгар уларыйыылар киирэри тураллар — кэлэр сыллартан өрөспүүбүлүкэ тыа хаһаайыстыбатыгар сорох боломуочуйалара улуустарга көһөр. Онон сибээстээн ити боппуруоска тыа хаһаайыстыбатын управлениетын иннигэр үбү сөптөөхтүк үллэрэн, бөдөҥ хаһаайыстыбаларга көмө оҥорор сорудах турар. Итиннэ нэһилиэк баһылыга бэйэтин өттүттэн «Силискэ» эмиэ көмө оҥорорго бэлэмин эттэ.

Уус Тааттаҕа тутулла турар баһаарынай чаас гарааһын көрдүбүт.  Бу тутуу үс өттүттэн үбүлэнэн турар. Өрөспүүбүлүкэттэн — тутуу матырыйаалыгар, улуустан иһинээҕи матырыйаалларга үбүлээһин барбыта. Онтон тутуу чааһын олохтоох эр дьон бэйэлэрэ дьаһанан үлэни ыыталлар.

Итиэннэ тутуу министиэристибэтигэр сайаапка түһэрсэн, улууспутугар эдэр испэсэлиистэргэ анаан 7 кыбартыыра ылар буоллубут. Отон биирдэстэрэ — Уус Тааттаҕа ананыаҕа. Онон, этэҥҥэ буоллахпытына, Алдан нэһилиэгэр эдэр испэсэлиискэ дьиэ көрүллүө.

Нэһилиэк олохтоохторо кэлэр сылга ыытыллар «Манчаары оонньууларыгар» бэлэмнэнии хаамыытын интэриэһиргээн билистилэр уонна көмө буоларга бэлэмнэрин биллэрдилэр.