Таатта улууһун олохтооҕо киһини өлөрөргө сорунан сууттаныаҕа

СӨ силиэстийэлиир управлениетын Чурапчытааҕы оройуоннар икки ардыларынааҕы силиэстийэлиир салаата эрдэ сууттана сылдьыбыт, киһини өлөрүүгэ сорунан (РФ Холуобунай кодексын 30 ыст. 3 ч. — 105 ыст. 1 ч.) буруйданар 62 саастаах киһиэхэ холуобунай дьыаланы силиэстийэлээн бүтэрдэ.   

Буруйданааччы 2025 сыл балаҕан ыйыгар иирсэн баран бииргэ арыгылаабыт киһитин өлөрөргө соруммутун силиэстийэ быһаарбыт.

Буруйданааччы дьиэтигэр баран куукуна быһаҕын ылбыт уонна билэр киһитин дьиэтин аттыгар турар массыынаҕа эрдэ иирсэ сылдьыбыт киһим олорор дии санаан, хаста даҕаны быһаҕынан анньан баран саһан хаалбыт.

Кэмигэр көмө оҥорон, эмсэҕэлээччи тыыннаах хаалбыт.

Быһылаан буолбутун туһунан иһитиннэрии киирбитин кэнниттэн полиция үлэһиттэрэ буруйданааччыны туппуттар. Силиэстийэ кэмигэр букатын атын киһи эмсэҕэлээбитэ биллибит.

Холуобунай дьыаланы силиэстийэлээн бүтэрэн суукка ыыппыттар. Бу туһунан СӨ борокуратууратын телеграм-ханаалыгар суруйаллар.