Тааттаҕа 3 саастаах оҕону матасыыкылынан түҥнэри көппүт киһини быһаардылар

Саха сиринээҕи Госавтоинспекция дааннайынан, бэҕэһээ, атырдьах ыйын 13 күнүгэр, киэһэ Таатта Харбалааҕар матасыыкыл  17 саастаах суоппара 3 саастаах кыыс оҕону түҥнэри көппүт.

Бэрэбиэркэ быһаарбытынан, тырааныспар учуокка турбатах. Суоппар Мординов уулуссатынан Амгинскай уулуссаҕа айаннаан испит, онуоха суолга эмискэ үс саастаах оҕо сүүрэн тахсыбыт. Эмсэҕэлээччи оҕону оройуоннааҕы балыыһаҕа киллэрбиттэр. Билиҥҥи туругунан, СӨ Доруобуйа харыстабылын министиэристибэтин дааннайынан, оҕо ыарахан туруктаах сытар.

Эрдэ иһитиннэрбиттэринэн, матасыыкылы ыытан испит киһи быһылаан миэстэтиттэн куоппут. Онон бэрэбиэркэ ыытыллар. Бу туһунан СИА суруйар.