Тааттаҕа аан бастаан оҕолорго Оһуокай лааҕыра үлэлээтэ

П.А.Ойуунускай аатынан Чөркөөх орто оскуолатын иһинэн 2017 сылтан сылы быһа төрөөбүт тылы чиҥэтиигэ аналлаах Сардаана Платоновна Ойунская аатынан «Сардаана» литературнай-краеведческай хайысхалаах лааҕыр үлэлиир.

Биһиги республикатааҕы Оһуокай уопсастыбабыт куратора, Дархан этээччи В.В.Хорунов хас да сыллаах куратор быһыытынан үлэтэ  Таатта улуустааҕы норуот айымньытын дьиэтин өйөбүлүнэн быйыл алтынньы 13-18 күнүгэр диэри Оһуокай лааҕыра тэриллэн үлэлээтэ. Манна 15 үөрэнээччи Таатта араас нэһилиэктэриттэн кэлэн дьарыктаннылар. Лааҕыры улуустааҕы норуот айымньытын киинин специалиһа М.Г. Егорова быһаччы тэрийсэн, былааннаһан, Оһуокай республикатааҕы уопсастыбатын кытары ситимнэһэн үлэлээбитэ, бары улуустарга холобурга эрэ сылдьыан сөп. Кэнники сылларга Таатта улууһугар Дархан этээччи Афанасий Николаевич Попов уонна улуустааҕы норуот айымньытын киинэ, улуустааҕы Оһуокай түмсүүтэ республикаҕа ыччаттары, үөрэнээччилэри кытары тэрээһиннээхтик үлэлиир. Ол түмүгэр аны оскуола оҕолоруттан элбэх этээччи тахсан эрэр. А.Е.Кулаковскай- Өксөкүлээх Өлөксөй аатынан Дьохсоҕон орто оскуолатыттан оҕолору оһуокайга үөрэтээччи Елена Егоровна Попова, Уус Тааттатааҕы оҕо искусствотын оскуолатын фольклор салаатын учуутала Айта Егоровна Васильева, П.А.Ойуунускай аатынан Чөркөөх орто оскуолатыттан Р.Н.Филатова үөрэнээччилэрэ хайыы үйэ улуус, республика Оһуокайга күрэхтэригэр кыттар буолан эрэллэр. Лааҕырга сүрүннээн бу оскуола оҕолоро уонна А.Е.Мординов аатынан Таатта лицейиттэн О.П.Андросова биир үөрэнээччитэ бу оҕолору кытары Оһуокай лааҕырыгар үөрэннилэр. Оҕолор үөрэхтэриттэн тэйбэттэрин инниттэн эбиэккэ диэри оскуолаҕа үөрэнэн баран эбиэттэн киэһэ дьарыктаналлар эбит.

Маастар-кылаастары СР үтүөлээх этээччитэ Л.А.Попова, Харбалаах оҕо искусствотын фольклорга специалиһа А.Н.Быгынанов, Дархан этээччилэр В.В.Хорунов, М.Т.Николаева, үтүөлээх этээччи М.М.Иванова ыыттылар. Маны сэргэ «Дружба» оҕо народнай ансаамбылыттан хореограф-режиссер Н.В.Козлова кэлэн этнофинтескэ эрчийдэ.
Биһиги куораттан салайааччыбыт, Оһуокай республикатааҕы түмсүү бэрэссэдээтэлэ А.Д.Данилов — Дьулуур Хаан өйөбүлүнэн үс этээччи оҕолору кытары тахсан билсистибит, маастар-кылаас биэрдибит. Кыра оҕо эрдэҕиттэн оһуокайынан утумнаахтык дьарыктанар, 11 кылаас үөрэнээччитэ Алена Колодезникова лааҕырга оһуокайбын сайыннара кэлэн дьарыктаммытым олус үчүгэй диэн санаатын үллэһиннэ. Кини учуутала Айта Егоровна ханнык ньыманан этиэххин баҕараҕын диэн эппитигэр, Алена бастакыттан таатталыы үҥкүү тылын этэргэ үөрэммит. Ааспыт сылга оҕолорго улуустааҕы күрэххэ кыайан, Александр Джурович туруорбут сүрүн бирииһин 25 тыһыынча соокуобайынан бириэмийэлэммитэ. Быйыл Үс Хатыҥ оһуокай күрэҕэр эмиэ киирэн кыттыбыта.
«Сардаана» лааҕыр начальнига Сергей Романович Дорофеев Оһуокай лааҕырын кыттыылаахтарыгар республикатааҕы Оһуокай түмсүүтүн бэрэссэдээтэлэ Александр Джурович оҕолор күрэхтэрин, оһуокайга дьарыктарыгар мэлдьи өйүүрүн иһин истиҥник махтанна. Хас биирдии лааҕырга кэлэн үөрэммит үөрэнээччилэргэ харчынан бириэмийэ ыыппытыгар махтанна. Манна эбэн эттэххэ, оҕолор эмиэ астыммыттарын биллэрдилэр. Бу лааҕырга быйыл саҥа оһуокайынан дьарыктанан эрэр үс уол: Айхал Винокуров, Олег Комиссаров, Владислав Аммосов кэлбиттэр уонна Оһуокай түмсүү дьаралыга үс төбөлөөх Өксөкү көтөр оһуокайдьыт хомоҕой тыллаах бэйиэт, кылыһахтаах куоластаах ырыаһыт уонна оһуокай тэтиминэн хамсаныы көрүҥүн кэпсээн, түһүлгэҕэ үҥкүүлэспиттэрин ордук астыммыттарын эттилэр.
Лааҕырга эппитим курдук кыра кылаастан дьарыктана сылдьар Алена Колодезникова, Айыллаана Попова, Симона Макарова хайыы үйэ этээччи быһыытынан сиппиттэрин, маастарыстыбалара үчүгэйин бэлиэтии көрдүм. Уонна саамай кылаабынайа, оҕолор олус баҕалаахтар. Бу биллэн туран кинилэр үөрэтээччилэриттэн тутулуктаах. Кинилэри үөрэтэллэрин таһынан элбэх күрэхтэргэ кытыннараллара хайҕаллаах. Маны сыаналаан республикатааҕы Оһуокай түмсүүтүн биир санаанан быыһаарыытынан Уус Тааттатааҕы оҕо искусствотын учуутала Айта Егоровна Васильеваҕа саха сирин үтүөлээх этээччитэ буолбутун туоһулуур түөскэ анньыллар бэлиэ, дастабырыанньаны туттардыбыт.
Үтүө дьыала сырыыта айаммытын харгыстаабата. Тааттаҕа лааҕырга тахсан үлэлээн киирэрбитигэр көмөлөспүт Оһуокай республикатааҕы түмсүүтүн салайааччыта А.Д.Даниловка уонна солбуйааччыта А.Л.Тарскайга махталбытын биллэрэбит. Оһуокай сайдар,утум салҕанар диэн санаалаах Тааттататан киирдибит.

Марта Николаева