Тааттаҕа ааспыт сыл түмүгүнэн бастыҥнары чиэстээтилэр

Тохсунньу 22 күнүгэр Таатта улууһугар «Сарыал» култуура киинигэр «Сыл бастыҥнарын» чиэстээтилэр. Сыл түмүгүнэн олох-дьаһах араас эйгэтигэр бастыҥ үлэһиттэр ааттара ааттанна диэн Таатта улууһун дьаһалтатын пресс-сулууспата иһитиннэрэр.

Ол курдук, өр сыллаах сыралаах үлэлэрин иһин  РФ Үлэҕэ уонна социальнай көмүскэлгэ министиэристибэтин махталын СӨ үлэҕэ уонна социальнай сайдыыга министиэристибэтин Тааттатааҕы нэһилиэнньэ социальнай көмүскэлин киинин үлэһиттэрэ Лена Ковлекова уонна Октябрина Филиппова ыллылар. Өр сыллаах таһаарыылаах үлэлэрин иһин “Саха Өрөспүүбүлүкэтин социальнай сулууспатын туйгуна” бэлиэни  Елена Дедюкина уонна Евдокия Халыева туттулар.

Саха сирин судаарыстыбаннаһын, социальнай-экономическай сайдыытын бөҕөргөтүүгэ кылаатын уонна өр сыллаах эҥкилэ суох сулууспатын иһин “Саха Өрөспүүбүлүкэтин муниципальнай сулууспатын туйгуна” бочуоттаах бэлиэнэн Таатта нэһилиэгин дьаһалтатын кылаабынай исписэлииһэ Розалия Бондарева наҕараадаланна. Успуорт уонна үөрэҕирии сайдыытыгар кылаатын иһин “Саха Өрөспүүбүлүкэтин учууталларын учууталлара” бэлиэнэн тириэнэр-преподаватель Дмитрий Попов бэлиэтэннэ.

Уопсастыбаннай олоххо көхтөөх,  үөрэххэ ситиһиилээх уонна оҕо хамсааһынын сайыннарыыга кылаатын иһин «Дьулуур» бэлиэ Тааттатааҕы лиссиэй 11-с кылааһын үөрэнээччитигэр Афоня Канаевка туттарылынна.

Ону тэҥэ Аан дойду таһымнаах күрэхтэһиигэ уһулуччу кыайыыны ситиспит, уолаттарга мас-рестлиҥҥэ Аан дойду турнирын кыайыылааҕын, И.Г. Федосеев аатынан оҕо спортивнай оскуолатын иитиллээччитин, Ытык Күөллээҕи 1-кы №-дээх оскуола 11-с кылааһын үөрэнээччитин Айтал Винокуровы чиэстээтилэр. Спортсмен уолга Руслан Захаров “Таатта улууһугар успуорт сайдыытыгар кылаатын иһин” бэлиэни туттарда. Маны таһынан Таатта улууһун успуордун кэмитиэтин аатыттан Андрей Сидоров сэртипикээт, Илларион Федосеев дьиэ кэргэнин аатыттан истипиэндьийэ туттардылар.

Итиэннэ сыл түмүктэринэн улуус үөрэҕин управлениета уонна успуордун кэмитиэтэ оҕолорго уонна спортсменнарга анал номинациялары туттардылар.