Тааттаҕа айанньыттары көрсөр аартык

Айанньыттар улуустар силбэһэр кыраныыссаларыгар анаан тохтуур үгэстээхтэр. Мантан улуус устуоруйата, кэпсээнэ-сэһэнэ саҕаланар.

Тааттаҕа «Манчаары оонньууларыгар» бэлэмнэнии иитинэн, дьон-сэргэ тохтоон, кэрэхсии көрөн ааһарыгар диэн, Таатта-Чурапчы суолларын ыпсыытыгар, аартыкка быйыл сааскыттан субуотунньук тэриллибитэ. Онон манна көстүүтэ тупсан, саҥардыллан турар. Бу күннэргэ силигин ситэриэхтээхтэр, ситэрэн-хоторон биэриэхтээхтэр.

Ыраахтан харахха быраҕыллар олоҥхоһут оҕонньор пааматынньыгыттан ураты барыта саҥардыллыбыт. Олоҥхоһут оҕонньорго сайыҥҥы ураһата оҥоһуллубут. Күрүөтэ-хаһаата уларыйыахтаах. Барыта кырааскаланан ситэриллиэхтээх-хоторуллуохтаах. Онон олоҥхоһут оҕонньорбут тэлгэһэлээх, сэргэлээх, ураһалаах, балаҕаннаах, ситэн -хотон эрэр диэн бэлиэтииллэр. Манна суола-ииһэ тэҥнэниллибит. Кэрэ Тааттаны көрө киирэр кирилиэһин саҥардан оҥорор былааннаахтар.

“Сириус” хампаанньа 12 м. үрдүктээх улууска киирэр аартыкка Таатта диэн суруктаах стеланы туттулар. Бүгүн бүтэрэн Кыйыга үлэлии бараллар.