Тааттаҕа Арассыыйа Дьоруойа Родимир Максимовка аналлаах быыстапка аһылынна

Таатта улууһун Хадаайы сиригэр баар «Таатта» литературнай-уус-уран түмэл-заповедникка Арассыыйа Дьоруойа Родимир Максимов-Бурхакка аналлаах «Алаас сиртэн алгыстаммыт сулус суоллаах буойуммут» быыстапка аһылынна. Бу туһунан СӨ Баһылыгын уонна Бырабыыталыстыбатын пресс-сулууспата иһитиннэрэр.

Быыстапкаҕа Родимир Максимов тус маллара, наҕараадалара, хаартыскалара, кини аатынан алмаас таас куоппуйата, ону тэҥэ дьоруой төрөөбүт дьиэ кэргэнин – төрүттэрэ, ырыа куттаах Кузьминнар династияларын туһунан матырыйааллар бааллар.

«Өрөспүүбүлкэҕэ анал байыаннай дьайыы кыттыылаахтарын аатын үйэтитиигэ үлэ күүскэ барара улахан суолталаах. Бүгүн биһиги инники күөҥҥэ дойдуну көмүскүү сылдьар хас биирдии байыаһынан киэн туттабыт. Кинилэр хорсун быһыыларыгар сүгүрүйэбит», – диэн Арассыыйа Дьоруойа Родимир Максимов быыстапка аһыллыытыгар эттэ.

Быыстапка аһыллыытыгар Бурхат бойобуой доҕоро – Арассыыйа Дьоруойа, легендарнай «Алеша» тааҥка наводчик-оператора Алексей Неустроев, оройуон уопсастыбаннаһын бэрэстэбиитэллэрэ, «Манчаары оонньууларын» XXII спартакиадатын спортсменнара уонна ыалдьыттара кытыннылар.

Арассыыйа Дьоруойа Родимир Максимов тыҥааһыннаах кыргыһыы буола турдаҕына, хамандыыра бааһырбытыгар командованиены бэйэтигэр ылыммыт байыас буолар. Штурмовой бөлөх хорсун атааканан өстөөх улахан бөҕөргөтүнүүлээх тирэх пуунун былдьаабыта. Өстөөх позицияларын төттөрү ыла сатаан, улахан күүстэри бииртэн биир атаакаҕа ыыппыта. Ол гынан баран, бары атаакалар утары охсуллубуттара. Онтон Родимир бэйэтэ, бааһыран да баран, тыҥааһыннаах киирсиитин салҕаабыта. Родимир Максимов хамаандатынан штурмовой бөлөх өстөөх түөртэ кимэн киирэргэ соруммутун төттөрү охсубута уонна Украина сэбилэниилээх күүстэрин 27 сэрииһитин суох оҥорбута. Дьоруой Таатта улууһун Туора-Күөл сэлиэнньэтигэр улааппыта.