Тааттаҕа байыастар дьиэ кэргэттэрин кытары көрүстүлэр

Таатта улууһугар бырабыыталыстыба отчуотун кэмигэр, бириэмэ төһө да ыгым буоллар, бырабыыталыстыба бэрэссэдээтэлин солбуйааччы Сергей Местников уонна тустаах салайааччылар нэһилиэнньэни кытта мунньах кэнниттэн, байыаннай дьайыы кыттыылаахтарын төрөппүттэрин, кэргэттэрин кытта көрүстүлэр, кыһалҕаларын иһиттилэр, сүбэ-ама биэрдилэр, санааларын уоскуттулар. Ол курдук, Уус-Тааттаҕа, Игидэйгэ, Чөркөөххө, Ытык Күөлгэ көрсүһүүлэр буоллулар.

Уус Тааттаҕа 9 ыалтан 10 байыас (7 уол быстах хомуурга хабыллан, 3 уол баҕа өттүлэринэн) байыаннай эпэрээссийэҕэ сылдьар. Кинилэр төрөппүттэрэ долгуйар ыйытыыларын биэрдилэр, кыһалҕаларын үллэһиннилэр. Үгүстэрин ититии ситимигэр холбонуу долгутар. Бу боппуруос эһиилгэ диэри быһаарыллыан сөп, киинтэн төһө ыраах олороллоруттан тутулуктаах.

Ытык Күөлтэн 34, Дьохсоҕонтон 11 киһи байыаннай дьайыыга кытта сылдьар. Төрөппүттэр барахсаттар долгуйаллара, ыгылыйаллара кэмнээх буолуо дуо? Сорохтор харах уулаах олорон, кэпсииллэр. Хаһан уоппуска бэриллиэхтээҕин ыйыталлар. Уолаттар бааһыран кэлэн да баран, мөлтөх туруктаах сылдьан,  төттөрү бара сатыылларын, сэрии илбиһэ киирэн хааларын, маныаха сахалыы эмтэнии наадатын туһунан, о.д.а. этиннилэр.

Ыаллар күннээҕи көрсөр кыһалҕаларын быһаарыыга, дьиэ акылаатын уларытыыга, сайын кыстыыр отторун булуналларыгар, о.д.а. улуус баһылыга Михаил Соров бастакы уочарат оҥоруохпут диэн эрэннэрдэ. Чахчыта, таатталар байыаннай дьайыыга сылдьар байыастар дьиэ кэргэттэрин кыһалҕаларын уҕараабат болҕомтоҕо туталлар.

Байыаннай дьайыы кыттыылаахтарын оҕолоро уһуйааҥҥа босхо сылдьыахтаахтар. Оҕолоро устудьуон буоллаҕына, истипиэндьийэлэригэр эбиллэр. Биир байыас ийэтэ туран, сиэнэ куоракка чааһынай уһуйааҥҥа төлөөн сылдьарын туһунан иһитиннэрдэ. Үлэ, социальнай сайдыы миниистирин солбуйааччы Афанасий Постников маны быһаарсыах буолла. Ону тэҥэ, байыас бааһыран баран, бырайыаһын бэйэтэ төлөөн кэлбитин, сорохтор төлөбүрдэрин ситэ ыла иликтэрин кэпсээтилэр. Миниистири солбуйааччы бу боппуруостары хонтуруолга ылла, ону тэҥэ, байыастар төрөппүттэрэ өрөспүүбүлүкэ иһигэр санаторийга-куруорка босхо эмтэнэр, сынньанар бырааптаахтарын санатта. Ыччат миниистирэ Петр Шамаев Донецкай Өрөспүүбүлүкэҕэ хаста да бара сылдьыбытын, биир дойдулаахтарбытыгар хайдах-туох көмө оҥоһулларын туһунан кэпсээтэ.

Таатта улууһугар өрөспүүбүлүкэҕэ бастакынан “Байыаннай дьайыы кыттыылааҕын”  дьиэ кэргэнин дастабырыанньатын оҥорбуттара. Бу манан туһанан, социальнай таксига олорсон, Ытык Күөлтэн Дьокуускайга диэри босхо айанныахтарын сөп. Таас чоҕу эмиэ улуус уйунар.