Тааттаҕа биэс мэндиэмэннээх дьиэ үлэҕэ киирдэ

РФ Бэрэсидьиэнэ Владимир Путин көҕүлээбит «Жилье и городская среда” национальнай бырайыагынан, Таатта улууһун Ытык Күөлүгэр  5 мэндиэмэннээх, 50 кыбартыыралаах таас дьиэ үөрүүлээх быһыыга-майгыга аһылынна.

Аныгылыы тупсаҕай оҥоһуулаах, толору хааччыллыылаах дьиэни Михаил Копырин салайааччылаах  “Элитстройком” тэрилтэ тутта.
Саҥа дьиэҕэ киирии сэрин-туомун алгысчыт Прасковья Петрова алгыс этэн, аал уоту аһатта.
Үөрүүлээх тэрээһиҥҥэ улуус баһылыгын эбээһинэһин толорооччу Руслан Захаров, Таатта нэһилиэгин баһылыга Егор Павлов, «Элитстройком” тэрилтэ салайааччыта Михаил Копырин уо.д.а. саҥа дьиэҕэ киирбит ыаллары эҕэрдэлээтилэр, дьиэ күлүүстэрин туттардылар, кыһыл лиэнтэни быстылар.
Сырдык, ыраас, саҥа кыбартыыра күлүүстэрин илиилэригэр тутан хаһаайыттар үөрүүлэрэ үтүмэн. Билигин бары даҕаны дьиэ-уот оҥостуутугар түбүк үөһүгэр түстэхтэрэ диэн Таатта улууһун дьаһалтата иһитиннэрдэ.