Тааттаҕа буойуттар ааттарын үйэтиттилэр

Таатта улууһун Чымнаайы нэһилиэгэр байыаннай дьайыы кыттыылаахтара Пантелеймон Иванов уонна Владислав Тарабукин ааттарын үйэтитэр монумент аһылынна.

Бу туһунан  «Аҕа дойду көмүскээччилэрэ» судаарыстыбаннай  пуонда филиалыгар иһитиннэрдилэр.

«Пантелеймон Пантелеймонович уонна Владислав Эдуардович дойду интэриэһин көмүскээһиҥҥэ биир бастакынан туруммуттара. Пантелеймон, чугас уонна бииргэ төрөөбүттэригэр Паанчык, ВДВ-га сулууспалыыр кэмигэр туйгун парашютист аатын ылбыта. Чечняҕа сулууспалаабыт, дьиҥнээх патриот уонна буойун буолан байыаннай дьайыыга сулууспалыы барбыт. Владислав — спортсмен, хотугу многоборьеҕа норуоттар икки ардыларынааҕы кылаастаах Арассыыйа успуордун маастара. Иккиэн ыччат лидердэрэ этилэр», — диэн пуондаҕа иһитиннэрдилэр.

Буойуттар ааттарын үйэтитэргэ биир дойдулаахтара уонна нэһилиэк дьаһалтата быһаарбыттар. Тэрээһиҥҥэ Таатта оройуонун баһылыга Айаал Бурцев, Уус Амма нэһилиэгин баһылыга Егор Васильев, Пантелеймон Иванов төрөппүттэрэ, ийэтэ, кэргэнэ уонна уола, ону сэргэ Владислав Тарабукин аймахтара сырыттылар.