Тааттаҕа Былатыан Ойуунускай пааматынньыгар сибэкки дьөрбөтүн уурдулар

Бүгүн, муус устар 26 күнүгэр, Саха Өрөспүүбүлүкэтин күнүн көрсө, Таатта улууһугар Чөркөөххө долгутуулаах бэлиэ күн буолла.

Тэрээһиҥҥэ мустубут дьоҥҥо СӨ Бырабыыталыстыбатын Бэрэссэдээтэлин солбуйааччы Сергей Местников бөлүhүөк суруйааччы, Саха автономиятын төрүттэспит бөдөҥ уопсастыбаннай-бэлитиичэскэй диэйэтэл Платон Алексеевич Ойуунускай сырдык аатыгар сүгүрүйдэ. Салгыы Таатта улууһун баһылыга, байыаннай дьайыы кыттыылааҕа Айаал Бурцев Саха Автономнай Сэбиэскэй Социалистическай Өрөспүүбүлүкэбитин төрүттэспит дьону – Былатыан Ойуунускайы, Максим Аммосовы, Исидор Бараховы, уо.д.а. киэн тутта ааттата. Тэрээһин кыттыылаахтарын Ойуунускай аатынан түмэл үлэһиттэрэ саха норуотун чулуу уола Былатыан Ойуунускай төрөөбүт, улааппыт алааһыгар сырытыннардылар.

Маны сэргэ, бэлиэ күнү көрсө «Саппыйаҕа» «Манна дьол-манна күн» быыстапка ыытылынна. 1937 сыллаахха, ССРС Үрдүкү Сэбиэтин дьокутаатыгар кандидат Платон Алексеевич Ойуунускай биир дойдулаахтарын, быыбардааччыларын кытта манна көрсүбүтүн кэпсээтилэр.

Платон Алексеевич Ойуунускай — уһулуччулаах уопсастыбаннай уонна бэлитиичэскэй диэйэтэл, ученай-филолог, поэт, прозаик уонна драматург. Кини Тааттаҕа Дьохсоҕон нэһилиэгэр 1893  сыллаахха сэтинньи 11 күнүгэр төрөөбүтэ.

С Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/3552 көрүөххүтүн сөп.