Тааттаҕа бырабыыталыстыба отчуота түмүктэннэ

Таатта улууһугар бырабыыталыстыба бэрэссэдээтэлин солбуйааччы Сергей Местников салайааччылаах улахан бөлөх баран, олунньу 8-10 күннэригэр ситэриилээх былаас отчуотун ыытан кэллэ.

Бөлөххө үөрэх миниистирэ Ирина Любимова, ыччат миниистирэ Петр Шамаев, доруобуйа харыстабылын миниистирин солбуйааччы Любовь Бурнашева, инновация, цифровой сайдыы миниистирин солбуйааччы Георгий Андреев, тутуу миниистирин солбуйааччы Евгений Афанасьев, тыа хаһаайыстыбатын миниистирин солбуйааччы Николай Афанасьев, үлэ, социальнай сайдыы миниистирин солбуйааччы Афанасий Постников, экэниэмикэ миниистирин бастакы солбуйааччы Мария Аргунова, физкультура, спорт миниистирин бастакы солбуйааччы Александр Бугаев,  халаан содулун чөлүгэр түһэрии дирекциятын дириэктэрэ Гаврил Слободчиков, уо.д.а. үлэлээтилэр. Маны тэҥэ, Ил Түмэн дьокутааттара Павел Пинигин, Михаил Гуляев, Семен Никитин тиийэн, дьону кытта көрүстүлэр.

Олохтоохтор маннык улахан, күүстээх бөлөх өтөрүнэн кэлэн үлэлии илигин уонна икки сыл ыытыллыбатах отчуоту кэтэспиттэрин биллэрдилэр. 2025 сылга Тааттаҕа XXII “Манчаары оонньуулара” спартакиада буолуохтаах. Манна бэлэмнэнии үлэтэ номнуо саҕаламмыт. Оонньууларга оробуочай бөлөҕү Сергей Местников салайар. Онон кэлбит миниистирдэр, солбуйааччылара, бырабыыталыстыба чилиэннэрэ бары бу спартакиадаҕа бэлэмнэнии үлэтигэр сыһыаннаахтар.

Ол курдук, Ытык Күөлгэ 450 миэстэлээх, интэринээттээх оскуола, поликлиника, стадион, спортивнай комплекс тутуллуохтаахтар. Икки оскуолаҕа хапытаалынай өрөмүөн оҥоһуллуохтаах. Киин паарка саҥардыллыахтаах. Улуус киинигэр диэри аспаал суол тэлгэниэхтээх. “Хаарбах дьиэттэн көһөрүү” бырагырааманан быйыл 5 дьиэ тутуллан, 600 кыбартыыраҕа дьон көһүөхтээх. Киин уулуссалар өрөмүөннэниэхтэрэ, сырдатыы үлэтэ ыытыллыа. Туттуллубут ууну ыраастыыр ыстаансыйа тутуллуохтаах. Чөркөөххө Былатыан Ойуунускай аатынан баараҕай Култуура киинэ дьэндэйиэҕэ. Биирдиилээн нэһилиэктэргэ уһуйааннар, оскуолалар, балыыһалар, хочуолунайдар тутуллуохтара. Мантан да атын үлэ элбэх. Тутууларга уопсайа 4 миллиард солкуобайдаах үп көрүллүбүт.

Санатар буоллахха, Таатта улууһугар кэккэ сылларга олорор дьиэ тутуллан киирбит: 2018 сыллаахха – 8,314 тыһ. кв. м, 2019 — 8,241, 2020 – 10,187, 2021 -9,549, 2022 -10,074 тыһ. кв.м.

Улуус олохтоохторун сүрүн туруорсар боппуруостара – чааһынай дьиэлэри киин ититиигэ холбооһун, хочуолунайдары тутуу, хаарбах дьиэлэри көһөрүү, түргэн интэриниэти киллэрии, уһуйааннары, балыыһалары, быһыттары тутуу, ыраас иһэр уу, о.д.а. 14 нэһилиэккэ барыларыгар: “Бырабыыталыстыба үлэтин көрдөрөр-иһитиннэрэр сириэстибэлэр нөҥүө билэн, көрөн олоробут. Ыытар үлэтин биһириибит, үчүгэйинэн сыаналыыбыт”, — диэн этиннилэр.

Ытык Күөлгэ түмүктүүр мунньахха улуус баһылыга Михаил Соров уонна ыччат миниистирэ Петр Шамаев бииргэ үлэлэһии сөбүлэһиитигэр илии баттастылар. Сөбүлэһии сүнньүнэн уопсастыбаннай түмсүүлэргэ аналлаах көрсүһүүлэр, дойду таһымыгар граннарга кыттарга анал үөрэхтэр ыытыллыахтара. Нэһилиэктэргэ устудьуоннар тутар этэрээттэрэ кэлэн үлэлиэхтэрэ.

Улуус киинигэр, киэҥ сир диэх курдук, боппуруос көрүҥэ да киэҥ, араас буолла. Улахан саалаҕа толору, 235 киһи кэлбит. Ол курдук, кинилэри оҕону сахалыы саҥардыы, сүһүөх ыарыылаахтарга өрөспүүбүлүкэтээҕи балыыһаны тутуу, пединститукка Иван Жегусов аатын иҥэрии, научнай кэмпириэнсийэҕэ сахалыы тылынан кыттыыга баалы эбии, Өлүөнэ өрүһү туоруур муостаны тутуу, гаас кэлиитэ, балбаах сокуона, учууталлары, быраастары олохсутуу, о.д.а. боппуруостар долгуталлар.

Талыы-талба Тааттаҕа сэргэхсийии тахсыбыта, сайдыы барара, элбэх тутуу ыытыллара, хаалбыт икки сылга күүскэ үлэлээн, түмсэн, дойдуларын сайыннарарга туруммуттара көстөр.