Бу күннэргэ, ахсынньы 18 уонна 19 күннэригэр, Таатта улууһугар бэрт сонун тэрээһин ыытыллаары турар.
Ол курдук, «Таатта саарыта, Дьохсоҕон тирэҥсэтэ» диэн этэрбэс тигиитигэр икки күн устата иистэнньэҥнэр аһаҕас күрэстэрэ ыытыллыаҕа.
Маны таһынан, «Өбүгэм хара ииһигэр иһирэх тыл» альбом сүрэхтэниитэ буолуоҕа. Таатта народнай тыйаатырын 65-с сезонун «Мин дьоллоохпун» испэктээгинэн арыйыаҕа.
Бу тэрээһин чэрчитинэн өрөспүүбүлүкэҕэ аан бастаан «Үйэлэр быыстарын сэгэтэр Таатта этэрбэстэрэ» ураты быыстапка буолуоҕа. Суолталаах тэрээһиҥҥэ Чөркөөх, Хадаайы , Игидэй түмэллэрин пуондаларыгар Дьохсоҕон, Игидэй, Чычымах, Харбалаах нэһилиэктэрин биирдиилээн олохтоохторугар харалла сытар этэрбэстэр, Таатта маастардарын үлэлэрэ көрдөрүүгэ туруохтара. Сүрүн болҕомтону тардыаҕа Хадаайы мусуойун пуондатыгар харалла сытар 1945 сыллаахха Сэһэн Боло Наттаараттан, Көмүс Халдьаайыттан хаһыыга булбут тоҥустуу тумустаах саары этэрбэһэ. Бу Таатта аатырбыт иистэнньэҥэ Изабелла Элякова тус толкуйунан тэриллибит бырайыак.
Изабелла Иннокентьевна өр сылларга өбүгэ төрүт ииһин үйэтитиигэ сыралаах үлэтин түмүктүүр түһүмэҕэ «Өбүгэ үгэһэ» уопсастыбаннай хамсааһын 20 сылыгар, ааптар 70 үбүлүөйдээх сааһыгар ананар.
— Бастакы быыстапканы дойдубар ыыппытым. Онно саатар быыбар буола турар буолан, хонтуораҕа быыстапканы тэрийэр көҥүллэммэт диэн баһылык хоһугар аҕыйах этэрбэһи турурорбутум. Үлэбин барытын мунньан баран түмүк оҥорбутум — өбүгэм төрүт таҥаһын төнүннэрэр үлэни ыыппыт аҕай эбиппин. Ол курдук, Таатта иистэнньэҥнэрин түмэн, кэлиҥҥи сылларга эр дьон таҥаһын тигэн, эр дьону сахалыы тыыннаан таҥыннардыбыт. Сүктэр кыыс ураа бэргэһэтин тиктэн кэтэ сылдьар саастаах дьахталларга сырдатан, бу көстүүнү тохтоппуппут. Өймөкөөн курдук ыраах сири кытта сибээстэһэн, онно саха таҥаһын тигиигэ үгүс үлэни ыытан, Олоҥхо ыһыаҕа ыытылларыгар, уоллара Дугуйдан Винокуров ыраасх саха атын туругутан көрө барарыгар саха эр киһитин кыһыҥҥы таҥаһын тикпиппит. Онуоха өймөкөөннөр бэйэлэрэ эмиэ күүс-көмө буолбуттара.
Бу улууспутугар ыытыллыахтаах өрөспүүбүлүкэтээҕи таһымнаах аан бастаан ыытыллар икки күннээх иистэнньэҥнэр илиинэн тигии күрэстэрэ балачча эрийсиилээх буолара күүтүллэр. Өрөспүүбүлүкэҕэ биллэр маастардары сэргэ урут киэҥ эйгэҕэ тахса илик иистэнньэҥнэр өбүгэбит хара ииһигэр сатабылларын, билиилэрин тургутуһуохтара, — диэн санаатын үллэһиннэ үбүлээр Изабелла Элякова.