Тааттаҕа «Халыма» айан суолун учаастагын чөлүгэр түһэрэллэр

Таатта улууһугар «Халыма» айан суолугар күүстээх ардах түһэн, суол алдьаммыта. Тырааныспар бары көрүҥнэригэр  бу сыл атырдьах ыйын 1 күнүттэн сырыы тохтотуллубута.

Билигин миэстэтигэр суолу чөлүгэр түһэрии үлэлэрэ ыытыллаллар. Бу туһунан «Бүлүү» суол управлениетын пресс-сулууспата иһитиннэрэр. «Бүлүү» суол управлениета суол учаастактарын нуормаҕа эппиэттиир турукка тиэрдиигэ былааннаах үлэни ыыталлар. 2024 сыл бэс ыйыгар 197-216 км суол учаастактарыгар хапытаалынай өрөмүөҥҥэ 2026 сылга диэри болдьохтоох судаарыстыбаннай хантараак түһэрсиллибит. Билигин 177-182 км, 216-264 км (Чурапчыттан Ытык Күөлгэ диэри) айан суол хапытаалынай өрөмүөннээһинин тэрээһиннэрин ыытарга бырайыактыыр-чинчийэр үлэлэр бараллар. Хапытаалынай өрөмүөн уонна саҥардыы үлэлэрэ 2025 сылтан саҕаланара былааннанар.

Суол өрөмүөнүн үлэтэ ыытыллыар диэри «Тааттаавтодор» АХ бэдэрээтчит, быстах кэмҥэ, күн-дьыл туругуттан көрөн суолу чөлүгэр түһэрии үлэни ыытар.  Суолга уустук быһыы-майгы үөскээбитинэн ыарахан уйуктаах таһаҕаһы тиэйэр суоппардары быраабыла нуормаларын тутуһалларыгар көрдөһөллөр. Массыына уопсай маассата 32 туоннаттан ордуо суохтаах.