Тааттаҕа хапсаҕайга 17-с өрөспүүбүлүкэтээҕи күрэс буолла

Бэҕэһээ, кулун тутар 22 күнүгэр, Ытык Күөлгэ Илларион Федосеев аатынан оҕо спортивнай оскуолатыгар «Эрчимэн Бэргэн» хапсаҕайга 17-с өрөспүүбүлүкэтээҕи биирдиилээн уонна хамаанданан бастыыр иһин  күрэс ыытылынна.

Барыта 31 хамаанда, 224 спортсмен ХХII «Манчаары оонньууларыгар» кыттарга көҥүл иһин, хапсаҕай албастарын туттан, кыайыы иһин кииристилэр. Күрэс сүрүн дьүүлдьүтүнэн ССРС көҥүл тустууга, Саха Өрөспүүбүлүкэтин бочуоттаах маастара Андрей Яковлев үлэлээтэ. Оттон күрэҕи саха успуордун солбуллубат кэмэнтээтэрэ Александр Васильев-Көрдүгэн иилээтэ. Биир күн устата икки көбүөрүнэн сытыы киирсиилэр, ыһыылаах-хаһыылаах бырахсыылар түмүктэринэн хамаанданан:
1 миэстэни — чурапчылар,
2 миэстэни — кэбээйилэр,
3 миэстэни — намнар ылары ситистилэр. Улуус бастакы хамаандата уус алданнар кэннилэриттэн бэһис, иккис хамаандата — сүүрбэһис миэстэни ыллылар.
Оонньууларга кыттыыга көҥүлү ылыы улуустарынан маннык буолла:
Абый-2, Амма-3, Анаабыр-3, Булуҥ-1, Үөһээ Бүлүү-5, Үөһээ Дьааҥы-4, Бүлүү-4, Горнай-4,Эдьигээн-1,
Кэбээйи-6, Мэҥэ Хаҥалас-5, Мииринэй-3
Муома-1, Нам-6,
Ньурба-4, Өймөкөөн-4, Өлүөхүмэ-3, Орто Халыма-5, Сунтаар-3, Таатта 1-5, Таатта 2- 2, Томпо-1, Уус Алдан-5, Усуйаана -1, Хаҥалас-4
Чурапчы-5, Эбэн Бытантай-1, Дьокуускай к.-5.

Күрэскэ бастыҥнар ааттара тэҥҥэ ааттанна. Ол курдук, «Бастыҥ бөҕөс» — Вячеслав Ноговицын,
«Кыайыыга дьулуурун иһин» — Михаил Николаев,
«Үчүгэй быраҕыы» — Александр Соломонов, «Бастыҥ дьүүлдьүт» — Александр Иванов, «Көрөөччү биһирэбилэ» — Дмитрий Павлов ааттаннылар. Бу ситиһии дьаныардаах дьарык, күүстээх санаа түмүгүнэн кэлбитэ саарбаҕа суох. Бу спортсмен уонна тириэньэр бииргэ үлэлээһиннэрин чаҕылхай түмүгэ. Хапсаҕай көбүөрүн муҥутуур кыайыылааҕынан, «Эрчимэн Бэргэнинэн» Чурапчы хапсаҕайдьыта Владимир Басов ааттанна.

Таатта көбүөрэ, мантан саас кытаанах дьарыгы, тулхадыйбат санааны, кыайыыны ситиһэргэ кыаҕы үөскэтэн, күүтүүлээх «Манчаары оонньууларыгар» кыайыылаахтар ааттаныахтара.

Таатта улууһун дьаһалтатын пресс-сулууспата