Тааттаҕа «Манчаары оонньууларын» көрсө

Бүгүн «Сахамедиа» пресс-киинигэр от ыйын саҥатыгар Таатта улууһугар ыытыллар «Манчаары оонньууларын» туһунан сырдаттылар. Манна суруналыыстар, далааһыннаах тэрээһиҥҥэ өйөбүл буолбут, көмөлөспүт успуонсардар, уо.д.а. кыттыыны ыллылар.

Быйылгы далааһыннаах тэрээһиҥҥэ — «Манчаары оонньууларыгар» бэлэмнэнии үлэлэр хайдах баран иһэллэрий? Төһө киһи күрэхтэһиигэ кыттарый?  Итинтэн да атын ыйытыыларга сырдатыы буолла.

СӨ Бырабыыталыстыбатын Бэрэссэдээтэлин солбуйааччы Сергей Местников үгэс курдук түөрт сылга биирдэ ыытыллар далааһыннаах тэрээһини көрсө улууска түөрт эбийиэк тутулла турарын иһитиннэрдэ. Эбийиэктэр ый бүтүүтүн диэки түмүктэнэн туттарыллалларын эттэ. Быйылгы «Манчаары оонньууларыгар» уопсайа 11  көрүҥҥэ күрэхтэһиэхтэрэ. Барыта 39 хамаанда кыттара былааннанар. Былааннаммытынан 1772 спортсмен түмсэн күөн көрсүөхтээх. Маны сэргэ, ыалдьыттарга анаан сэттэ уонтан тахса култуура тэрээһинэ ытыллыахтаах. Манна даҕатан, «Манчаары оонньуулара» киэҥ далааһыннанарын, «Матч-ТВ»  көрдөрөргө бэлэмин эттэ.

СӨ физкултуураҕа уонна успуорка миниистирэ Леонид Спиридонов успуорт национальнай көрүҥнэригэр күрэхтэһии тиһиктээхтик ыытыллара бэлиэтэнэрин, ханна да үтүө холобур буоларын, итинэн Саха сирэ инники күөҥҥэ сылдьарын иһитиннэрдэ. Маныаха хапсаҕай, мас тардыһыыта аан дойду болҕомтотун тардыбытын, киэҥ биһирэбили ылбытын тоһоҕолоон бэлиэтээтэ. Урукку өттүгэр ыһыахтарга күрэхтэһэр, илин-кэлин түсүһэр эбит буоллахтарына, билигин аан дойду ааттаах-суоллаах спортсменнара холоноллорун эттэ. Маны сэргэ, кини «Азия оҕолоро», Саха сирин норуоттарын спортивнай оонньуулара, уо.д.а. күрэхтэһиилэр куруук өрө көтөҕүллүүлээхтик, киэҥ далааһыннаахтык уонна дуорааннаахтык ыытыллалларын бэлиэтээтэ.

Этэн аһарбыттарын курдук, «Манчаары оонньууларыгар» култуура тэрээһиннэрэ тиһиктээхтик ыытыллыахтара. Манна улуус уус-уран кэлэктииптэрэ, өрөспүүбүлүкэ киэн туттар тыйаатырдарын артыыстара кыттыыны ылыахтара. Маны сэргэ, уран тарбахтаах иистэнньэҥнэр, улахан уустар үлэлэрин түһүлгэҕэ мустубут ыалдьыттар кэрэхсии, сэргии көрүөхтэрэ.

Тэрээһин иитинэн «Манчаары оонньууларын» тэрийэн ыытарга ахсаабат кыһамньыларын уурбут, өйөөбүт, көмөлөспүт бары успуонсардарга махтаннылар.