Тааттаҕа «Манчаары оонньууларын» символларын аҕаллылар

Таатта улууһугар эһиил буолуохтаах «Манчаары оонньуулара» спортивнай оонньууларга  бэлэмнэнии үлэтэ күргүөмнээхтик бара турар.  Бу күннэргэ оонньуулар символлара (маскоттара) киһи саҕа уҥуохтаах 3D куукулалар оҥоһуллан номнуо кэлбиттэр.

Бу туһунан Таатта улууһун Норуот айыммньытын дьиэтин салайааччыта Гаврил Вырдылин санаатын үллэһиннэ:

—Таатта улууһугар оонньуулары көрсө пуонда тэриллибитэ. Ол үбүнэн символлары «Офсет» тэрилтэҕэ сакаастаан, тиэйэн аҕаллыбыт. Талисманнары таларга куонкурус биллэрбиппит.  Уонча үлэ киирбититтэн —  Сайаана Доргуева үлэтин талбыппыт. Бу кыыс куонкуруска кыайан 100 тыһ.солкуобайынан наҕараадаламмыта.  Талисманнарбытын Ытык Күөл сэлиэнньэтин киин болуоссатыгар туруоруохпут. Оонньуу буолара 300 хонук хаалбытын балаҕан ыйын 4  күнүгэр арыйыахпыт диэн былаанныыбыт.