Хаартыска Таатта улууһун дьаһалтатын пресс-сулууспатыттан
Таатта улууһугар араас социальнай эбийиэктэр, оскуолалар, оҕо уһуйааннара, балыыһалар, успуорт комплекстара тутуллаллар. Бу эбийиэктэр бары улуус олохтоохторун олорор усулуобуйаларын тупсарарга уонна хаачыстыбалаах үөрэҕи, мэдиссиинэ көмөтүн ыларга туһуланаллар.
Улууска социальнай эйгэни сайыннарыы бырагыраамаларын чэрчитинэн саҥа эбийиэктэр тутуллаллар уонна эргэлэр саҥардыллаллар. Ити социальнай инфраструктура итэҕэстэрин суох оҥорорго уонна оройуон нэһилиэнньэтин аныгылыы өҥөнөн хааччыйарга кыаҕы биэрэр. Ону таһынан, биллэн турар, социальнай эбийиэктэри тутуу улуус олохтоохторун олохторун таһымын уонна уйгутун сайыннарарга итиэннэ саҥа үлэ миэстэтин тэрийэргэ көмөлөһөр.
Бүгүн бу хайысхаҕа үлэ хайдах барарын туһунан Таатта улууһун баһылыгын бастакы солуйааччы Руслан Захаров кэпсиир:
— Ытык-Күөлгэ 2023 сыллаахха 4 тыһ кв.м. тахса иэннээх аныгылы оҥоһуулаах поликлиника тутуллан үлэҕэ киирэн, дьоммут-сэргэбит хаачыстыбалаах мэдиссиинэ өҥөтүнэн туһанар кыахтаннылар. Бу поликлиника «Доруобуйа харыстабыла» федеральнай бырайыагынан тутуллубута. Оттон быйыл кулун тутар ыйга Туора Күөл нэһилиэгэр 50 миэстэлээх, толору хааччыллыылаах оҕо уһуйаана аһылынна. Билигин Ытык Күөлгэ 450 оҕо үөрэнэригэр аналлаах, 100 миэстэлээх интэринээттээх, А.Е.Мординов аатынан лиссиэй дьиэтэ тутуллан үлэҕэ киирэрэ хаалла. Билиҥҥи туругунан оскуолаҕа сылаас киирдэ, аны күһүн үөрэнээччилэр саҥа оскуола дьиэтигэр үөрэниэхтэрэ.
Кэлэр 2025 сылга Таатта улууһугар Манчаары оонньуулара ыытыллалларынан сибээстээн, успуорт эбийиэктэрэ тутулла тураллар. Ол курдук, Ытык Күөлгэ элбэх хайысхалаах успуорт комплекса, 1000 миэстэлээх, сүүрэр ыллыктаах стадион, улахан ипподром, аһаҕас физкультурнай-чэбдигирдэр комплекс уо.д.а. эбийиэктэр тутуллаллар.
Билигин социальнай эбийиэктэри тутуу тэтимнээтик барар, тиһиктээх үлэ ыытыллар. Бу барыта дойдубут бэрэсидьиэнин, өрөспүүбүлүкэбит Ил Дарханын уонна бырабыыталыстыбабыт ыытар сөптөөх бэлиитикэтэ. Национальнай бырайыактарынан уонна атын даҕаны бырагыраамаларынан тыа сиригэр элбэх тутуу баран сэргэхсийии таҕыста, сайдыы суола тэлэлиннэ, онон үрдүкү салалталарга махталбытын биллэрэбит.
Бүгүн, ахсынньы 21 күнүгэр, өрөбүллээҕи Оһуокайбытыгар Эҥсиэли түмсүүтүттэн инники кэскиллэрбит, ыччаттар киирэн алгыстаах Оһуокай түһүлгэтин…
Оо, улуу көстүү! Очуос таас үрдүттэн харах ыларынан улуу өрүс иэнэ нэлэһийэр, халлааны кытта силбэһэн,…
2023 сыллаахха Былатыан Ойуунускай аатынан Саха тыйаатырыгар үлэлии кэлбит кэнники көлүөнэ “щепкинэцтэри” көрөөччүлэр хайыы үйэ…
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
2021 сыллаахха түөрт оҕолоох Даниловтар дьиэ кэргэн Уһук Илиҥҥи ипотека бырагырааматыгар киирсэн уһаайба атыыласпыттара, «Килбиэнстрой»…
Хаһыаппыт бүгүҥҥү ыалдьыта, дьоруойдуу быһыы, бойобуой доҕордоһуу диэн тугун бэркэ билэр, биһиги биир идэлээхпит, кэллиэгэбит,…