Тааттаҕа «Манчаары оонньууларынан» үлэ-хамнас тэтимирэр

«Манчаары оонньууларыгар» бэлэмнэнии үлэлэр Тааттаҕа тиһиктээхтик салҕаналлар.

Үлэ-хамнас хаамыытын туһунан тэрээһин дириэксийэтин салайар П.Е.Захаровтан ыйыталастым.

Петр Егорович иһитиннэрбитинэн, Ытык Күөлгэ Алексей Егорович Турнин аатынан күрэс уораҕайа (спорт дыбарыаһа), Дьулуруйар Ньургун Боотур аатынан стадион сүрүн үлэлэрэ бүппүттэр. Билигин бөҕү-сыыһы ыраастааһын үлэтэ хаалбыт. Саһыл Уйалаах ипподромугар икки күн устатыгар күргүөмнээх субуотунньуктар ыытыллыбыттар.

—Ипподром ис уонна тас күрүөтүн оҥорууну олоччу бүтэрдибит. Сүүрүк аттар турар хааччахтара оҥоһуллаллар. Иван Иванович Бочонин салайааччылаах «Тааттаавтодор» тэрилтэ туруу үлэһиттэрэ аттар сүүрэр сирдэрин оҥоруутун түмүктээн эрэр. Кэлэр нэдиэлэҕэ анал хамыыһыйалар кэлэн көрүөхтээхтэр. Ыытыллыбыт үлэлэ туттарыллыахтаахтар.

Маны сэргэ, киэҥ хабааннаах үлэлэр далааһыннаах тэрээһин кыттыылаахтарын, тэрийээччилэрин оонньуулар кэмнэригэр олохтуур уонна аһатар эбийиэктэрбитин ситэриигэ ыытылла тураллар. Бу үлэлэргэ үөрэх эйгэтин бары тэрилтэлэрэ, ону сэргэ хас биирдии эбийиэккэ нэһилиэктэрбит сыһыарылланнар былааннаммыт, тус эрээттээх үлэлэрин олоччу бүтэрдилэр. Ону тэҥэ, хорчуоппалар үлэлииллэригэр анаммыт түһүлгэлэргэ күүстээх үлэлэр ыытыллаллар. Оонньуулары көрсө түмүктүүр түһүмэххэ киириэхтэрэ. Бу үлэлэргэ ОДьКХ Тааттатааҕы филиалын сварщиктара күүстээх кыттыыны ыла сылдьаллара олус үөрдэр. Ону сэргэ олохтоох урбаанньыттарбыт, ыаллыы улуустарбытыттан Уус Алдантан, Чурапчыттан биригээдэлэр кэлэннэр төһүү күүс, көмө, өйөбүл буолаллар. Бары ыытыллар үлэргэ үлэ кэлэктииптэрэ, олохтоохтор кыттыылара тирэх буолар.

XXII Манчаары оонньууларын сүрүн тутууларын иилээн-саҕалаан ыыппыт Александр Михайлович Ханин салайааччылаах «Монтажник» ПК бары үлэһиттэригэр улууспут бары олохтоохторун, тэрийээччилэр ааттарыттан сүҥкэн махталбытын тиэрдэбит.

Тупсаҕайдык туттан олорууга ыытыллар араас хабааннаах үлэлэр киэҥ далааһыннаахтык ыытылла тураллар. Ытык Күөлбүт тулатыгар тутулла турар Набережнайбыт, стадиоммутугар киирии аартыгын тупсарыы үлэлэрэ салҕаналлар, оонньуулары көрсө түмүктэниэхтэрэ. Ону таһынан улууспут киинигэр тэрилтэлэр, биирдиилээн ыаллар тиэргэннэрин тупсарыыга үтүмэннээх үлэлэр ыытыллыннылар. Чурапчы уонна Таатта улуустара быысаһар аартыкпыт олоччу саҥардыллан бүтэн эрэр. Итиэннэ Тыараһаҕа, Чөркөөххө, Боробулга уонна Ытык Күөлгэ киирии стелалар биир тэҥ ньыманан оҥоһуллан эмиэ бүттүлэр. Кэлэр нэдиэлэҕэ Боробул стелата ситэрэ хаалла. «Тааттаавтодор» тэрилтэ бөһүөлэк иһинээҕи уулуссалары аспааллааһыҥҥа, ону тэҥэ Харбалаахтыыр аартыкка аспаал суолу оҥоруунуүүр эмиэ болдьоҕун иннинэ түмүктүүр соруктаах.

Ырыаҕа ылламмыт, хоһооҥҥо холбоммут Ытык Таатта XXII Манчаары оонньууларыгар бэлэмнэнии үлэлэрин кыайа-хото тутан иһэр диэтэххэ омуннааһын да, дарбатыы да буолбатах. Бу түмсүүлээх үлэ үтүө түмүктэрэ, харса суох хардыылааһын хардата буолар.