Тааттаҕа «САХА КВН» оонньууларын финала түмүктэннэ

Оҕолору КВН-ҥа кыттарга, КВН туһунан өйдөбүл ылалларыгар үөрэтэллэр. Ол иитинэн Таатта улууһугар сылын аайы “Саха КВН” күрэхтэһиитэ ыытыллара үтүө үгэскэ кубулуйда.

Быйыл кулун тутар 27-28 күннэригэр  оскуола оҕолорун «САХА КВН»  оонньууларын финала түмүктэннэ.

«Саха КВН» өрөспүүбүлүкэтээҕи күрэһэ Тааттатааҕы норуот айымньытын дьиэтигэр ыытылынна. Барыта 8 хамаанда: «Сээркээн Сиэннэрэ» Уус Алдантан, “Чиккэстэр” Мэҥэ Хаҥаластаан, “Хадаар абытайдара” Чурапчыттан, “Ситик” Тааттаттан, “Түмэн” Горнайтан, “Амака” Ньурбаттан, “Duoraan” Уус Алдантан уонна “Дьүлэй дьээбэлэрэ” Тааттаттан кытыннылар. Улуустартан ордук бэлэмнээх, чочуллубут бырагыраамалаах, чаҕылхай оонньуулаах оҕолор мустан илин-кэлин түһүстүлэр. «Саха КВН» оонньооччуларын дэгиттэр талааннарын, булугас өйдөрүн сыаналыыр дьүүллүүр сүбэ маннык састааптаах үлэлээтэ:

1.Евгений Филиппов, “Саха КВН” бэрэссэдээтэлин бастакы солбуйаачыта, өрөспүүбүлүкэтээҕи  оскуола оҕолорун финалын дьүүллүүр сүбэ бэрэссэдээтэлэ;

2.Андрей Егоров, сүрүн редактор,  студеннар  лигаларын  чемпиона, «Сборная ЯГСХА” хапытаана;

3.Өркөн Адамов, Көрдөөх “Eagles” “Саха КВН” хамаандатын көхтөөх оонньооччута, оскуола оҕолорун лигатын вице-чөмпүйүөнэ;

4.Дмитрий Анастатов, Көрдөөх «Eagles”  “Саха КВН” хамаандатын хапытаана. Оскуола оҕолорун лигатын вице-чемпиона, Бүтүн Өрөспүүбүлүкэтээҕи тыа ыччатын лигатын муҥутур кыайыылааҕа, “Көрдөөх Көкөт” анал аат хаһаайына.

5. Станислав Самсонов, Таатта улууһугар “Бастыҥнар хамсааһыннарын” олохтоох салаатын исписэлииһэ.

Күрэхтэһии 4 түһүмэҕинэн барда: “Эҕэрдэлэһии”, “Уустук ыйытынньык”, «Хапытааннар күрэстэрэ», «Музыкальнай дьиэҕэ сорудах». Тобуллаҕас толкуйдаах, сахалыы сайдам тыллаах-өстөөх хамаандалар түмсүүлээхтэрин көрдөрөн маннык миэстэлэргэ уонна анал ааттарга тигистилэр:

1 миэстэни “Түмэн” Горнай улууһун хамаандата ылла, 2-3 миэстэлэргэ Уус Алдантан сылдьар «Сээркээн Сиэннэрэ» уонна “Duoraan” хамаандалар таҕыстылар.

Анал бириис хаһаайынынан “Ситик” Таатта улууһун хамаандата буолла.

Маны таһынан анал ааттар иҥэрилиннилэр:

1. «Саха КВН эрэлэ» — “Хадаар абытайдара”, Чурапчы улууһа;
2. «Наара суох» — “Чиккэстэр”, Мэҥэ-Хаҥалас улууһа;
3. «Бастыҥ эҕэрдэлэһии» — “Ситик”, Таатта улууһа;
4. «Уран тыл маастара» — “Duoraan”, Уус Алдан улууһа;
5. «Алтан Чуораан» — “Дьүлэй дьээбэлэрэ”, Таатта улууһа;
6. «Көрөөччүлэр биһирэбиллэрэ»-“Амака”, Ньурба улууһа;
7. «Мэкчиргэ мэйии» — «Сээркээн Сиэннэрэ», Уус-Алдан улууһа;
8. “Бастыҥ куолас”- Прибылых Авелита “Түмэн”, Горнай улууһа;
9. «Көрдөөх Көкөт» -Канаев Афоня «Ситик», Таатта улууһа;
10. «Күн Күлүүк»- Шадрина Вика «Амака», Ньурба улууһа;
11. «Бастыҥ топер» — Атастыров Саян, “Дьүлэй дьээбэлэрэ”, Таатта улууһа;
12. «Саталлаах Саарыын» — Слепцова Анна Гаврильевна, Федорова Ульяна Викторовна, “Түмэн” хамаанда салайааччылара, Горнай улууһа.

Өрөспүүбүлүкэбит кэлэр кэскилэ бары өттүнэн сайдыылаах, чөл олохтоох, айар-тутар куттаах буола үүнэригэр туһуламмыт үлэбит куруук ситиһиилээх буоллун!

Матрена  Алексеева,

Тааттатааҕы «Сатабыл» оҕо айымньытын дьиэтин педагог-тэрийээччитэ.