Тааттаҕа ситэриилээх былаас отчуота Даайа Амматыттан саҕаланна

Ситэриилээх былаас отчуота Таатта улууһугар бүгүн Даайа Амматыттан саҕаланна.

Нэһилиэк 1983 сыллаахха СӨ Тыатын хаһаайыстыбатын министиэристибэтин «Кырыс уонна оһорбо сирдэри сөргүтүү» анал дьаһалынан «Таатта» сопхуос отделениетын быһыытынан тэриллибитэ. Өрөспүүбүлүкэ араас муннугуттан комсомольскай путевканан бастакы 50 киһилээх дэсээн кэлэн үлэтин саҕалаабыта. 1991 с. Даайа Аммата туспа нэһилиэк статуһун ылар: туспа сэбиэттэнэр, дьаһалталанар, баһылыктанар. Ол иннинэ Тыараһа нэһилиэгэр бас бэринэн олорбут.

Бүгүҥҥү күҥҥэ нэһилиэккэ 255 киһи олорор (быыбардааччытын ахсаана — 160 киһи). Оскуолаҕа 38 оҕо үөрэнэр, уһуйааҥҥа 19 оҕо сылдьар, дьиэҕэ олорооччу — 9 оҕо. Араас үөрэх кыһатыгар 16 устудьуон үөрэнэр. 78 хаһаайыстыба баар. Элбэх оҕолоох ыал (3-5 оҕолоохтор) — 14 ыал.

2021 сылтан саҕалаан икки таас дьиэ тутуллан, 2022 с. үлэҕэ киирбиттэрэ. Онно 13 хаарбах дьиэҕэ олорбут 98 киһи көспүтэ. Дьиэлэри бу нэһилиэк Бочуоттаах олохтооҕо, аатырбыт тутааччы Александр Ханин «Монтажник» тэрилтэтэ туппут. Оччолорго нэһилиэк баһылыгынан үлэлээбит СӨ тутууга туйгуна Петр Петров сүүрэн-көтөн туттарбытын олохтоохтор махтана ахталлар.

«Билигин сүрүн кыһалҕабыт — саҥа оскуоланы тутуу. Хаарбах дьиэҕэ үлэлии, үөрэнэ олороллор. Уһуйаан эмиэ эргэрэн, дьиэтэ суох буолан, таас дьиэҕэ баар дьаһалта үлэлииригэр анаммыт кыбартыыраны онно биэрбиппит«, — диэн кэпсиир дьаһалта сүрүн исписэлииһэ Полина Собакина.

Онон, күүтүллүбүтүн курдук, отчуокка сүрүннээн оскуола тутуутун боппуруоһа буолла. СӨ тутууга миниистирин бастакы солбуйааччы Евгений Афанасьев Даайа Амматын 25-50 миэстэлээх оскуола-оҕо саада тутуута өрөспүүбүлүкэҕэ 27 — с уочаракка турарын иһитиннэрдэ.

Биэс оҕолоох ийэ Сахайаана Прохорова:

«Тоҕо оҕолор улаатан дьиэттэн тахсан бардахтарына, мин, биэстэ төрөөбүт ийэ, элбэх оҕолоох ийэ статуһум сүтэн хааларый?» диэн ыйытта. Элбэх оҕолоох ийэҕэ улуустааҕы социальнай управление салайааччыта Михаил Тарасов ирдэбили сиһилии быһааран биэрдэ. Ол курдук: «Быйылгы сылтан элбэх оҕолоохторго статустара үйэлэрин тухары хаалар буолла. Муус устарга хамыыһыйа элбэх оҕолоох ийэлэргэ көрүллэр чэпчэтиилэргэ туһуламмыт боппуруостары сиһилии ырытан көрүөҕэ», — диэн эттэ.

Даайа Амматын олохтооҕо Петр Белолюбскай бааһынай хаһаайыстыбалаах. Кини түөрт оҕолоох аҕа быһыытынан босуобуйа боппуруостарын быһааран биэрэргэ көрдөстө. Манна эмиэ улуустааҕы социальнай управление салайааччыта Михаил Тарасов
«единэй» босуобуйаны ылар дьон социальнай хантараакка эмиэ киирсэр буоллулар диэн туран, тустаах ирдэбили сиһилии быһааран биэрдэ.

Салгыы олохтоохтор Дьиэбэгэнэни туоруур мас муоста тутуутун туруорустулар. Бу муостанан Чурапчы улууһун Хахыйах (Соловьев), Мырыла уонна Таатта Даайа Амматын нэһилиэктэрэ сылдьаллар эбит. Уопсай реестргэ бу муоста тутуута киирэ илик. Өйүүн, олунньу 12 күнүгэр, Ытык Күөлгэ буолар түмүктүүр отчуокка баһылык бу боппуруоһу эмиэ туруорсалларыгар эттэ.

Бүгүн бырабыыталыстыба бастакы бөлөҕө Чөркөөххө отчуоттуу айаннаата.

Ааптар хаартыскаларга түһэриитэ.