Тааттаҕа тыл дьылҕатын туһунан кэпсэттилэр

Олунньу 6-7 күннэригэр Таатта улууһугар саха суругунан уус-уран литературата төрүттэммитэ 125 сылыгар анаммыт »Саргы-дьаалы улааттын, сахалыы саҥа сатараатын, саха омук сайыннын» диэн тэрээһин, төгүрүк остуол ыытылынна.

Бастакы күн дьон Өксөкүлээх Өлөксөй »Байанай алгыһын» суруйбут Уучай алааһыгар баран, сүгүрүйэн, илбис тылын иҥэринэн кэллилэр. Иккис күн Былатыан Ойуунускай, Өксөкүлээх Өлөксөй пааматынньыктарыгар сүгүрүйүү сиэрэ-туома буолла.

Онтон пленарнай мунньахха тыл дьылҕатын туһунан кэпсэттилэр. Манна учуонайдар, тыл үөрэхтээхтэрэ, учууталлар, суруйааччылар, уопсастыбанньыктар, уо.д.а. муһуннулар.

Вилюяна Никитина, уопсастыбанньык:
— Биһиги 4 тыһыынчаттан тахса оҕо, 1,5 төрөппүт күннээҕи тылларын лексическэй бириинсибинэн чинчийдибит. Ол курдук, сахалыы эйгэлээх 14 улууска чинчийии ыыттыбыт. Онно оҕолор 45,6%-ра эрэ сахалыы саҥараллар эбит.
Төрөппүт оҕотун кытта сахалыы кэпсэтиитэ, кинигэни ааҕыы олох аҕыйаабыт. Онон, бастатан туран, дьиэ кэргэҥҥэ сахалыы саҥарарга, кинигэни ааҕарга ыҥырабын.

Гаврил Андросов, Саха сирин Суруйааччыларын сойууһун бэрэссэдээтэлэ: «Маннык сиэрдээх, саргылаах кэпсэтиинэн, түмсүүнэн саха суругунан литературата 125 сылын арыйбыппыт кэрэхсэбиллээх», — диэн эттэ.

Вячеслав Доллонов, СӨ Суруйааччыларын сойууһун бэрэссэдээтэлин э.т.: »Бу тэрээһин бэрт түргэнник хомуллубута ыччаты саха тылыгар сыһыарар кыһалҕаны норуот өйдөөбүтүн көрдөрөр’‘, — диэн бэлиэтээтэ.

Олег Колесов, »Саха» НКИХ дириэктэрэ:
— Саха тэлэбиидэнньэтэ 89% сахалыы, 2% аҕыйах ахсааннах омуктар тылларынан, уоннааҕыта нууччалыы саҥарар. Сахалыы, эбэҥкилии ойуулуктары оҥоробут. »Харчы» сериалбыт »Тэффи» бириэмийэтин ылбыта. Тылы сайыннарыыга ыччакка чугаһаан »Олоҥхо баттл» күрэс, »Тыый» чабырҕах, »Күн оһуохайа» күрэс ыытыллаллар. Барыта куһаҕан буолбатах, туох барыта эргийэн кэлэ турарын курдук, үчүгэй буолуо диэн эрэнэбин. Салгыы хайдах сайыннарабыт диэн кэпсэтиэххэйиҥ, — диэн эттэ.

»Айар» кинигэ кыһатын дириэктэрэ Август Егоров онно сөбүлэспэккэ, улахан кыһалҕа үөскээбитин ыйда.
— Оҕолорбут улааталларын саҕана, аны 30-50 сылынан сахалыы саҥа сүтэр дуо? Оччотугар саха диэн омук суох буоларыгар тиийэр. Аҕыйах сыл иһигэр сахалыы кинигэни ааҕыы таһыма лаппа түстэ, интэриниэт киирэн, саха тыла улахан охсууну ылла.
Туох барыта иилииртэн-саҕалыыртан тахсар. Онон судаарыстыбаннай стратегия ылыллара наада. Ол да тутах, чопчу үлэлиир судаарыстыбаннай уорган, тэрилтэ наада. »Тыл сүбэтэ» уопсастыбаннай түмсүү боломуочуйата кыра, — диэн эттэ.

Бу курдук кэпсэтэн баран, »Саха литературата, төрүт үгэстэр», »Саха тыла — креативнай экономикаҕа», »Саха ыала. Саха тыла. Саха тыына», »Алампа айымньыларыгар саха аймах сарсыҥҥыта» хайысхаларынан арахсан, кэскиллээх кэпсэтиини тэниттилэр.

Ангелина Васильева.
Ааптар түһэриитэ.