Тааттаҕа уйгу-быйаҥ ыһыаҕа ыһылынна

Бу күннэргэ Таатта улууһун Чымнаайы нэһилиэгэр үтүө үгэскэ кубулуйбут өрөспүүбүлүкэтээҕи бааһынай хаһаайыстыбалар уонна кэпэрэтииптэр ыһыахтара буолан ааста. Тэрээһин бүтүн өрөспүүбүлүкэттэн уон улуустан 200 кэриҥэ киһини түмтэ.

Бу туһунан Мэҥэ Хаҥалас улууһун пресс-сулууспата иһитиннэрэр.

СӨ бырабыыталыстыбатын бэрэссэдээтэлин солбуйааччы Михаил Никифоров эҕэрдэ тылыгар, тыа хаһаайыстыбатынан дьарыктаныы киһиттэн элбэх сыраны, дьаныары эрэйэр диэн эттэ. Кини төрөөбүт сирдэрин дьиҥнээхтик таптыыр эрэ дьон олохторун бүтүннүү бу эйгэҕэ аныылларын, күн-дьыл биһиги дьоммут үлэни ылсан лоп-бааччы толороллорун чуолкайдык көрдөрөллөрүн бэлиэтээтэ.

«Фермердэр тыа сирин олоҕун таһымын үрдэтэллэр, тыа хаһаайыстыбатын сайыннарарга быһаччы үлэлииллэр. Үрдүк көрдөрүүлэр биһиги фермердэрбит көмөлөрүнэн ситиһиллэр – өрөспүүбүлүкэҕэ тыа хаһаайыстыбатын бородууксуйатын 74 % аччыгый хаһаайыстыбаларынан оҥоһуллар. Кинилэргэ үлэлэригэр-хамнастарыгар үрдүк көрдөрүүлэри-ситиһиилэри баҕарабын, бэйэбит айылҕаттан ыраас төрүт аспытын дьон-сэргэ туһугар тэнитэ-дэлэтэ турдуннар!», — диэтэ Михаил Никифоров.

Оттон тыа хаһаайыстыбатын миниистирэ Александр Атласов: «Кэккэ сылларга аграрийдар ыһыахтара көннөрү бырааһынньык эрэ буолбакка, биир санаалаах туруу үлэһит дьон мустан уопут, санаа атастаһар, кыһалҕаларын быһаарсар үтүө түһүлгэлэрэ буолла», — диэн бэлиэтээтэ.

Ыһыахха мустубут дьон саха үгэһинэн илии-атах оонньуутугар илин-кэлин түһүстүлэр. Ол кэннэ «Бастыҥ фермер-2023» куонкурус саҕаланна. Уопсайа алта киһи кытынна: Хаҥаластан – Розалия Петрова, Ньурбаттан – Аркадий Федоров, Тааттаттан – Петр Варламов, Чурапчыттан – Варвара Сивцева, Амматтан – Николай Кайдалов уонна Мэҥэ Хаҥаластан – Дьулустаан Говоров. Күрэхтэһии интэриэһинэй түгэнинэн фермердэр күннээҕи үлэлэригэр туттар ураты ньымаларын сырдатыы буолла. Ол курдук, тыа дьоно бэйэлэрин өйдөрүнэн тобулбут толкуйдарын, сэби-сэбиргэли хайдах гынан мындырдаан табыгастаахтык туһаныахха сөбүн көрдөрдүлэр, дьон-сэргэ сөҕүүтүн-махтайыытын ыллылар.

Спортивнай күрэхтэһиилэр түмүктэринэн: I миэстэ – Мэҥэ Хаҥаластан төрүттээх Дьулустаан Говоров, уу харчынан 50 000 солк. бириис ылла. II миэстэ – Амматтан төрүттээх Николай Кайдалов. III миэстэ – Хаҥаластан төрүттээх Розалия Петрова. Спортивнай балыктааһын күрэҕэр, спиниҥҥэ Чурапчы улууһун хамаандата кимиэхэ да иннин биэрбэтэ.

Спортивнай күрэхтэр уонна «Бастыҥ фермер-2023» куонкурус түмүктэринэн Таатта улууһуттан кэлбит хамаанда бастаата, мэҥэ хаҥаластар иккис, аммалар үһүс буоллулар.
Тэрээһин түмүгэр өрөспүүбүлүкэ агропромышленнай эйгэтигэр үтүө кылааттарын киллэрбит дьоҥҥо судаарыстыбыннай уонна биэдэмистибиннэй наҕараадалары туттардылар.