Тааттаҕа Владимир Андросов аатынан хапсаҕайга өрөспүүбүлүкэтээҕи турнир ыытыллыаҕа

Ытык Күөлгэ хапсаҕайга тыа сирин спортсменнарын ортолоругар ССРС үс төгүллээх чөмпүйүөнэ Владимир Андросов аатынан өрөспүүбүлүкэтээҕи турнир  ыытыллыаҕа.

Көбүөргэ үс сааһынан арахсан бөҕөстөр күөн көрсүөхтэрэ диэн СИА иһитиннэрэр. Турнир сэтинньи 30 күнүттэн ахсынньы 1 күнүгэр диэри ыытыллыаҕа. Тустууга алта ыйааһыҥҥа эр дьон,  биэс ыйааһыҥҥа эр дьон-бэтэрээннэр (40-тан үөһэ саастаахтар) киирсиэхтэрэ, ону тэҥэ 2007-2008 сс. төрүөх эдэр хапсаҕайдьыттар алта ыйааһыҥҥа холонуохтара. Тэрийээччилэр кыттааччылар ортолоругар абсолютнай күрэхтэһиини тэрийиэхтэрэ. Кыайыылаахтар бары сыаналаах бириистэринэн наҕараадаланыахтара.

Күрэхтэһии Таатта улууһугар эһиил сайын ыытыллыахтаах Манчаары оонньууларыгар бэлэмнэниинэн буолуоҕа.