Тааттаҕа выпускниктар «Алгыстаах аартыкпыт» диэн кинигэни сүрэхтээтилэр

Олунньу 14 күнүгэр Таатта улууһун Игидэй нэһилиэгэр олус истиҥ тэрээһин буолан ааста. Ол курдук, Игидэй орто оскуолатын 1979 сыллаахха бүтэрбит выпусктар төрөөбүт нэһилиэктэригэр мустан, оскуоланы бүтэрбиттэрэ 45 сылыгар хомуллан тахсыбыт «Алгыстаах аартыкпыт» диэн кинигэни сүрэхтээтилэр.

Кинигэни кылаас лиидэрэ Хоютанова Оксана Прокопьевна хомуйан таһааттарбыта. Киниэхэ  балта Маркова Саргылаана Прокопьевна күүс-көмө буолбут.
Кинигэ сүрэхтэниитин эдьиийдии-балыс олус сэргэхтик, сонуннук иилээн-саҕалаан ыыттылар. Оскуолаҕа киирии маҥнайгы умнуллубат түгэниттэн саҕалаан, олох киэҥ аартыгар эрэллээхтик хардыылаан, үлэһит буола үүннэллэригэр тиийэ сүрдээх үчүгэйдик көрдөрдүлэр.
Оччотооҕу умнуллубат түгэннэри, оҕо саас, пионер, комсомол кэрэ кэмнэрин санаһан, ыллаан-туойан, оҕолуу оонньоон-көрүлээн ыллылар.
Тэрээһиҥҥэ уһуйааҥҥа баспытааталлаабыт, оскуолаҕа үөрэппит учууталлара кэлэн истиҥ-иһирэх ахтыылары оҥордулар. Ол курдук, Хаҥалас улууһуттан ветеран учуутал Скрябина К.Г. кэлэн Игидэй оскуолатыгар үлэлээбит сылларын ахтан-санаан, үөрэнээччилэрин эҕэрдэлээтэ уонна квиз оонньуу ыытта.
Тэрээһин иккис аҥаарыгар бииргэ үөрэммит доҕордорун Унаров Николай Филиппович сырдык аатыгар хомус тардыытыгар күрэх буолла.
Күрэҕи Николай Филиппович дьиэ кэргэнэ Амма улууһуттан кэлэн сүрүннээн, аҕаларын аатын ааттатан, анал бириистэри туруоран, сүрдээх үчүгэй күрэҕи тэрийдилэр. Оскуола оҕолоро, улахан дьон кыттыылаах күрэххэ муҥутуур кыайыылаах аатын ыаллыы сытар Дьүлэй нэһилиэгиттэн эдэр кэскиллээх Свинобоев А. ылары ситистэ.
Кыттааччылар бары анал ааттарынан, бириистэринэн наҕараадаланнылар.

Тэрээһини выпуск илиилэригэр талааннаах оҕолоро анал быыстапакалара киэргэттэ, кэлбит ыалдьыттары минньигэс астаах фуршетынан күндүлээтилэр.
Бу курдук сонун, сэргэх тэрээһин этэҥҥэ түмүктэннэ, дьон-сэргэ биһирэбилин ылла.

Выпуск бука бары оҕолоругар нэһилиэкпитигэр өссө биир чаҕылхай тэрээһини тэрийэн ыыппыккытыгар улахан махтал. Дьоллоох, дьоруобай, этэҥҥэ буолуҥ.

 Жулева Кристина Алексеевна, библиотекарь