Тааттаҕа уустук балаһыанньа оннунан хаалар

Таатта улууһугар уу таһыма үрдээн ыксаллаах быһыы-майгы эрэсиимэ олохтоммута, онон Чөркөөх, Боробул, Кыйы, Ытык Күөл сэлиэнньэлэрин Саха сирин суһал бөлөҕө болҕомтотугар тутан олорор.

Ол туһунан СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков иһитиннэрдэ. «Улахан болҕомто Таатта улууһугар Таатта үрэххэ ууруллар. Чөркөөххө уонна Кыйыга уу түһэр. Боробулга уу таһыма уларыйбакка турар. Ытык Күөлгэ уу таһыма кыратык үрдүүрэ бэлиэтэнэр. Күнү-дьылы кэтээн көрөр сулууспа уонна Суһал бөлөх билгэлээһининэн уу эмискэ тахсыа суоҕа. Чөркөөххө 77 ыал тиэргэнин уонна икки олорор дьиэни, Боробулга 4 тиэргэни, биир олорор дьиэни уу ылла. Атын сэлиэнньэлэргэ уу ылбыт эбийиэгэ суох», — диэн Дмитрий Лепчиков эттэ.

Бу түөрт нэһилиэккэ 58 быыһааччы, ол иһигэр 38 СӨ Быыһыыр сулууспатын уонна 20 Арассыыйа ЫБММ Саха сиринээҕи управлениетын исписэлиистэрэ үлэлииллэр. Уу таһыма суукканы эргиччи кэтэниллэр, күргэлэр, кытыллар бөҕөргөтүллэллэр, наада буоллаҕына дьону тыынан таһаллар.