Хаартыска: Елена Потоцкая.
Таатта улууһун киинигэр Ытык Күөлгэ ыытыллыбыт ситэриилээх былаас отчуотугар олохтоохтор кэлиҥҥи сылларга улууска кэккэ социальнай эбийиэктэр тутуллан, социальнай-экэнэмиичэскэй сайдыы биллэ тэтимирбитин бэлиэтээтилэр.
Биир сүрүн тутуунан 2023 сыллаахха “Доруобуйа харыстабыла” национальнай бырайыагы олоххо киллэрэн, симиэнэҕэ 200 киһи сылдьар поликлиниката буолар. Куйаар ситиминэн РФ Бэрэсидьиэнэ Владимир Путин бэйэтин эҕэрдэтин тиэрпитэ.
Ытык-Күөлгэ ыытыллыбыт ситэриилээх былаас отчуотун кэнниттэн СӨ Бырабыыталыстыбатын Бэрэссэдээтэлин солбуйааччы Сергей Местниковтан Тааттаҕа оробуочай сырыытын туһунан санаатын үллэстэригэр көрдөспүппэр, салайааччы маннык хоруйдаата:
— Бырабыыталыстыба отчуотун үс күн устата үс хайысханан сылдьан, Таатта улууһун олохтоохторун кытта ирэ-хоро кэпсэттибит.
Отчуот кэмигэр олохтоохтор хочуолунайдары тутуу, суол-иис боппуруостарын, олорор дьиэлэри киин ититэр ситимҥэ холбооһун, Дьокуускайга диэри пассажирдары тиэйиини тэрийии боппуруостарыгар тохтоотулар. Ытык-Күөлгэ «Олимпийскай» хочуолунай кыамтата тиийбэтин туруорустулар. Бу эбийиэк бырайыагын оҥорон, «Хомунаалынай инфраструктураны саҥардыы» бырагыраамаҕа киллэриигэ үлэ барыаҕа. Үгүс киһи «Халыма» федеральнай суол Тааттанан ааһар кэрчигин аспааллыырга туруоруста. Бу боппуруоска эмиэ үлэ бара турарын тустаах управление салалтата дьоҥҥо быһааран биэрдэ. Таатта улууһун олохтоохторун туруорсубут үгүс боппуруоһа анал Боротокуолга киирэн, ону быһаарыыга үлэлэһиэхпит. Отчуот түмүгүнэн таатталар сайдыы өттүгэр улахан хамсааһын баарын бэлиэтээн туран, Ил Дархан Айсен Николаевка уонна өрөспүүбүлүкэ бырабыыталыстыбатыгар махтал тылын истиҥин эттилэр.
Кырдьык, аҕыйах сыл иһигэр Таатта улууһугар кэккэ социальнай эбийиэктэр баар буоллулар уонна өссө да тутулла тураллар. Бу эбийиэктэр Манчаары оонньуулларын биир кэлим былааныгар киирэн, Ил Дархан уонна өрөспүүбүлүкэ салалтатын хонтуруолугар туран, олоххо киирдилэр. Ол курдук, 2024 сыллаахха 450 оҕо үөрэнэр 100 миэстэлээх интэринээттээх лицей дьиэтэ үлэҕэ киирэн, тигинэччи үлэлии турар. Улуус киинигэр спортивнай эбийиэктэр тутуллан, сотору кэминэн түмүктэниэхтэрэ уонна Манчаары оонньууларыгар ааннарын тэлэччи арыйыахтара. Ол курдук, улуус киинигэр ипподром үлэлиэҕэ, Чөркөөххө модульнай спортивнай саала, Боробулга успуорт былаһаакката, маны таһынан, суолу-ииһи тупсарыы ыытыллыаҕа.
СӨ Бырабыыталыстыбатын Бэрэссэдээтэлин солбуйааччы Сергей Местников тыыл бэтэрээннэригэр Татьяна Аргуноваҕа, Елена Васильеваҕа, Лидия Тихоноваҕа Улуу Кыайыы 80 сылыгар анаммыт үбүлүөйдээх мэтээли туттарда.
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
Быйыл Өймөкөөн улууһун нэһилиэктэригэр хайа да сыллааҕар түмүктээх, сонун сүүрээннэри саҕар олохтоох былаас отчуота буолан…
Лена куорат биир тутаах тэрилтэтигэр буҕаалтырынан үлэлээбитэ отучча сыл буолан эрэр. Бүгүн киэһэ үлэтиттэн тахсар…
Бу туһалаах судургу сүбэлэр кимиэхэ баҕарар наада буолуохтара. Оҕо сарсыарда уһуктан биэрбэтэҕинэ, сөбүлүүр ойуулугун эбэтэр…
sakha-sire.ru саайт «Кэпсээннэ истиэҕиҥ» диэн бырайыагар «Саха сирэ» хаһыат суруналыыһа Ульяна Захарова «Кыыс кыһалҕата» кэпсээнин…
Таатта улууһун И.В. Николаев аатынан Харбалаахтааҕы норуот айымньытын дьиэтигэр Ийэ-тыл уонна сурук-бичик күнүнэн «Омук күүһэ…