Таатталар сир сахалыы аатын каартаҕа киллэрдилэр

Ытык Күөлгэ саха суругунан литературата төрүттэммитэ 125 сылынан, Төрөөбүт тыл, сурук-бичик күнүн көрсө төгүрүк остуол ыытылынна.

Манна саха тылын туһугар ыалдьар, үлэлэһэ сылдьар дьон мустан, хайысхаларынан арахсан, кэскиллээх кэпсэтии, саргылаах сэһэргэһии буолла.

Ытык Күөл олохтооҕо, кыраайы үөрэтээччи Гаврил Гаврильевич Вырдылин сир-дойду аатын каартаҕа киллэрии үлэтин көҕүлээбит эбит.

— Бу биһиги үйэбитигэр сирбит-дойдубут ааттара умнуллан эрэллэр. Ыччат дьоммут билбэт буолла. Нууччалыы олуонатык ааттаммыта да элбэх. Бу биһиги, билэр дьон бардахпытына, букатын умнуллар кутталлаах.
Онон сөбүлэһэн баран, землеустроитель каартатыгар сирдэрбит ааттарын сахалыы киллэрдибит. Бу ким эрэ өтөҕө диэн кыра сирдэри эмиэ киллэрдибит. Сорох мөккүөрдээх түгэннэргэ кырдьаҕастары кытта сүбэлэстибит.
Ханнык баҕарар киһи билигин төлөпүөнүн арыйда да, интэриниэтинэн киирэн көрөр кыахтанна. Онон сирбит ааттарын үйэтиттибит, — диэн кэпсээбитин, мустубут дьон олус биһирээтилэр.

Бу үтүө холобуру атын улуустар, нэһилиэктэр үтүктүөхтэрин сөп эбит диэн биир түмүккэ кэллилэр.

Ангелина Васильева.
Ааптар түһэриитэ.