Таба иитиитин сайыннарыы боппуруостарынан төгүрүк остуол ыытылынна

Дьокуускайга табаһыттар IV сийиэстэрэ буола турар. Бу тэрээһин иитинэн  «Северное домашнее оленеводство Республики Саха (Якутия) во второй четверти XXI века (состояние, проблемы, перспективы)» диэн төгүрүк остуол буолла.

Манна өрөспүүбүлүкэ сүүрбэттэн тахса улууһуттан  уонна дойду атын эрэгийиэннэриттэн табаһыттар, министиэристибэлэр, биэдэмистибэлэр бэрэстэбиитэллэрэ, Ил Түмэн дьокутааттара кыттыыны ыллылар.

Өрөспүүбүлүкэ салалтатын аатыттан тэрээһин түһүлгэтигэр мустубут ыалдьыттарга эҕэрдэтин СӨ Бырабыыталыстыбатын Бэрэссэдээтэлин солбуйааччы Сергей Местников тиэртэ. Кини таба иитиитинэн дьарыктаныы тыа хаһаайыстыбатын салаатыгар биир сүрүн хайысханан буоларын, хоту улуустарга дьон үлэлэнэрин бэлиэтээтэ.

«Өрөспүүбүлүкэ таба ахсаана элбииригэр уонна аһы-үөлү оҥорон таһаарыыны сайыннарарга  интэриэстээх. Маны тэҥэ, таба иитиитинэн дьарыктаныы — бу тыа хаһаайыстыбатын салаата эрэ буолбакка, хотугу аҕыйах ахсааннаах норуоттар олохторун укулаата, төрүт дьарыктара буолар. Биһиги бу хайысханы сайыннарарга, бастатан туран, өрөспүүбүлүкэҕэ үгэс буолбут олохторун укулаатын харыстыырга болҕомтобутун эмиэ уурабыт«, — диэн этэр Сергей Местников.

Вице-премьер тэрээһиҥҥэ өрөспүүбүлүкэ табаһыттарыгар РФ тыатын хаһаайыстыбатын министиэристибэтин Махтал суруктарын уонна «Саха сирин тыатын хаһаайыстыбатын бэтэрээнэ» бочуоттаах бэлиэни туттарда.

Төгүрүк остуолга «Северное домашнее оленеводство Республики Саха (Якутия) во второй  четверти XXI века (состояние, проблемы, перспективы)» тиэмэҕэ СӨ тыа хаһаайыстыбатын уонна ас-үөл бэлиитикэтин миниистирэ Артем Александров дакылаат оҥордо. Улуустартан дьиэ табатын иитиини, инникитин хайдах буолуоҕун туһунан Муома улууһун Улахан Чыыстайыттан нэһилиэк баһылыгын солбуйааччы Павел Мараказов, Нерюнгри оройуонуттан баһылыгы солбуйааччы Ньургун Владимиров,  Усуйаанаттан «Таба-Яна» тыа хаһаайыстыбатын потребительскай кэпэрэтиип дириэктэрэ Марат Кожанов иһитиннэриилэри оҥордулар, санааларын үллэһиннилэр.

Төгүрүк остуол кыттыылаахтара промышленнай хампаанньалары кытары үлэлэһии, бөрөнү аҕыйатыы, оҕолору сайыҥҥы сынньалаҥнарыгар ыстаадаларга төрөппүттэригэр илдьиигэ уонна күһүн үөрэх саҕаланыытыгар төттөрү аҕалыыга үбүлээһин туһунан, уо.д.а. боппуруостары көтөхтүлэр.  Бу ыйытыылар боротокуолга киллэрилиннилэр уонна СӨ Бырабыыталыстыбатын таһымыгар көрүллүөхтэрэ.

СӨ тыатын хаһаайыстыбатын иһитиннэриитинэн, 2025 сыл саҕаланыытыгар таба ахсаана 162 тыһ. тиийбит. Бу 2020 сылтан 6,5% улааппыт. Табатын ахсаанынан Саха сирэ Арассыыйа субъектарын ортотугар үһүс миэстэҕэ сылдьар. Өрөспүүбүлүкэ 20 оройуонугар табанан дьарыктаналлар. Табанан дьарыктанар хаһаайыстыбалар 33 мөл. кэриҥэ гектар мэччирэҥ сири туһаналлара бэлиэтэнэр.

Сиһилии https://www.sakha.gov.ru/news/front/view/id/3487514  манна киирэн көрүөххүтүн сөп.

СӨ Ил Дарханын уонна Бырабыыталыстыбатын пресс-сулууспата

Саргын Скрябин хаартыскаларга түһэриитэ, СИА