Таба ыырдарынан алмаастаах түбэлэргэ

Биллэрин курдук, бастакы геологтар Саха сирин алмаастаах түөлбэлэрин аан бастаан арыйалларыгар табаһыттар уонна кинилэр дьиэ кэргэннэрэ кырата суох көмөлөспүттэрэ. Ол гынан баран, үгүс киһи кинилэр ортолоругар түөрт саастаах уол оҕо баарын билбэт буолуохтаах. Ол кырачаан табаһыт аата – Иннокентий Иннокентьевич Винокуров. Кини аатын быйыл бөдөҥ алмааска иҥэрдилэр.

2025 сыллаахха АЛРОСА хампаанньа муус устар 12 күнүгэр “Заполярная” туруупкатыттан көстүбүт 69,56 караат ыйааһыннаах улахан алмааска уһулуччулаах быраас, чинчийээччи-учуонай Иннокентий Винокуров аатын иҥэрбитэ.

Саҥа, бөдөҥ алмаас хирург-быраас, чинчийээччи-учуонай, талааннаах суруйааччы, олоҕун 44 сылын бар дьоҥҥо анаабыт үтүөкэннээх киһи аатынан сүрэхтэммитэ. Иннокентий Иннокентьевич СӨ Доруобуйатын харыстабылын штаты таһынан сүрүн исписэлииһэ, бастыҥ торокальнай хирург. Кини фтизиохирургия сулууспатын төрүттэспит дьонтон биирдэстэрэ. Тус бэйэтэ уонунан эпэрээссийэ инновациялаах ньыматын айан киллэрбит, сүүһүнэн киһи олоҕун быыһаабыт киһи.

И.И. Винокуров Уһук Хоту дойду тыйыс усулуобуйатыгар сэллиги билим таһымынан чинчийэн акылаат буолар билим үлэлэрин суруйбут ааптар. Ол барыта кини дуоктар буолар диссертациятыгар уонна 120-тэн тахса араас үлэтигэр түмүллэн киирэ сылдьар. Кини – прозаик-суруйааччы, Арассыыйа Суруйааччыларын сойууһун чилиэнэ, эбэҥки литэрэтиирэтигэр бастакы историческай арамааннар ааптардара, хотугу норуоттар култуурунай нэһилиэстибэлэрин харыстыырга улахан кылааты киллэрбит киһи.

Иннокентий Иннокентьевич 1950 сыллаахха атырдьах ыйын 3 күнүгэр Өлөөн улууһун Сухаана бөһүөлэгэр төрөөбүтэ. Өлөөн орто оскуолатын бүтэрэн баран, Саха судаарыстыбаннай университетыгар мэдиссиинэ факультетыгар киирбитэ. Алта сыллаах үөрэҕин уонна Тбилиситээҕи университет интернатуратын кэннэ Өлөөн дьонуттан аан бастакынан мэдиссиинэ биир саамай уустук идэтин – хирург идэтин – баһылаабыта. Үлэтин төрөөбүт Өлөөнүн балыыһатыттан саҕалаабыта, кэлин улуус сүрүн бырааһа буолбута.

1985 сыллаахха Иннокентий Иннокентьевич билимҥэ хоннохтоохтук ылсарга сананан, дьиэ кэргэнин кытта Дьокуускай куоракка көһөн кэлэн, “Фтизиатрия” билим киинигэр үлэҕэ киирбитэ. Манна кини кэскиллээх чинчийээччи быһыытынан талаана-дьоҕура арыллыбыта. Кэлин СӨ Доруобуйа харыстабылын министиэристибэтин штаты таһынан сүрүн торокальнай хирура буолбута. Иннокентий Иннокентьевич 40-тан тахса сыл устата, олоҕун тиһэх күннэригэр диэри, ыарыһахтары эмтии-томтуу, эпэрээссийэлии, хирургия саҥа, инновациялаах ньымаларын олоххо киллэрэ сылдьыбыта.

И.И. Винокуров дэгиттэр талаана аҥаардас мэдиссиинэҕэ эрэ буолбакка, айар-тутар араас эйгэҕэ эмиэ арыллыбыта. Кини таастан дьоҕус скульптуралары оҥорор, лирическэй хоһооннору, ырыа дьүрүллэрин суруйара. Ол гынан баран, ордук умсугуйан устуоруйа арамааннарын суруйара. Иннокентий Иннокентьевич “Оленьими тропами к месторождениям алмазов Якутии” кинигэтигэр алмаас бырамыысыланнаһын сайдыытыгар Өлөөн олохтоохторун кылаатын бастакынан бэлиэтээбитэ.

kyym.ru