Табаарыһын дьиэтиттэн бэстилиэти, унтууну уорбут

Урут сууттана сылдьыбыт Дьокуускай олохтооҕо  пневматическай бинтиэпкэни, бэстилиэти уонна унтууну кыбартыыраттан уоран тутулунна. Бу туһунан ИДьМ пресс-сулууспата иһитиннэрдэ.

Дьокуускай куоракка полиция 3-с нүөмэрдээх отделыгар кыбартыыратыттан тус малын-салын уордарбыт  киһиттэн сайабылыанньа киирбит. Уоруу  уопсай суумата —   120 000 солк. кэриҥэ.

Суһал-ирдиир үлэ  кэмигэр холуобунай ирдэбил үлэһиттэрэ  урут сууттана сылдьыбыт, сайабылыанньалаах билэр киһитин — 28 саастаах  уорбаланааччыны туппуттар.

Ол курдук сайабылыанньалаах киһи дьиэтигэр мустан бары аһаабыттар.  Ол кэннэ  хаһаайын табаарыһын кытары дьыалаларынан салгыы барбыттар. Кыбартыыраҕа уорбаланааччы хаалбыт. Онуоха эр киһи хаалан баран, билэр дьонун ыҥыртаан, салгыы арыгылаабыттар.  Уоруйах  дьиэттэн тахсаарыгар саа  кейсин, пневматическай бинтиэпкэни,  пневматическай  бэстилиэти, кобураны, газовоперцовай бэстилиэти, унтууну ылбыт.

Уоруллубут мал барыта сокуоннай хаһаайыныгар төннөрүллүбүт.  Эр киһиэхэ РФ Холуобунай кодексын   158 ыст. 2 ч. холуобунай дьыала көбүтүллүбүт.