Табаҕа оскуолатыгар «Учууталга махтал» пааматынньыгы бэлэхтээтилэр

Бэҕэһээ, балаҕан ыйын 1 күнүгэр,  өрөспүүбүлүкэ оскуолаларыгар араас ис хоһооннооох үөрүүлээх тэрээһиннэр буоллулар.

Дэлэҕэ да, бу дьоро күнү дьон «норуот бырааһынньыгынан» ааттыа дуо? Мэҥэ Хаҥалас улууһун Р.А.Бурнашов аатынан Табаҕа орто оскуолатыгар бэрт ураты суолталаах тэрээһин буолан ааста. Быйыл манна 99 оҕо үөрэнэр. Оскуолаҕа 24 учуутал үлэлиир.

Оскуола биир сүрүн уратыта — быйыл манна иккис сылын педагогическай кылаас аһыллан үлэлиир. Былырыын биэс оҕоттон икки выпускник уопсай үөрэхтээһин кыһатын  үрүҥ көмүс мэтээлинэн бүтэрбит.

https://t.me/sakhasire20/60495?single

Саамай кэрэхсии көрбүт түгэним — оскуола боруогун аан бастаан атыллааччылар Бастакы чуорааннарын бэйэлэрэ тыаһатан киирдилэр. Бу туһунан репортааһы «Саха сирэ» сайт телеграмыгар сиһилии көрүҥ.

 

https://t.me/sakhasire20/60507?single

 

Өссө биир суолталаах түгэн — балаҕан ыйын 1 күнүгэр, өрөспүүбүлүкэҕэ суох холобуру оскуоланы 50 сыллааҕыта бүтэрбит 10 «А», 10 «Б» кылаастар выпускниктара көрдөрөн сөхтөрдүлэр. Бу кылааһы 1975 сыллаахха 42 оҕо бүтэрбит.

Кинилэртэн мас ууһунан биллэр Виталий Саввин үөрэппит учууталларыгар дириҥ махталын биллэрэн, «Учууталга махтал» диэн пааматынньыгы оҥорон бэлэхтээтэ! Дьэ, уус киһи чочуйан оҥорор да буолар эбит, доҕоттор! Маастар алын сүһүөх кылааһын учуутала  Валентина Ивановна Левина  уонна бу кылаас үөрэнээччитэ Табаҕа орто оскуолатын аан бастаан кыһыл көмүс мэтээлинэн бүтэрбит Вика Стручкова уобарастарынан сирэйдээн, «Учууталга махтал» диэн бэртээхэй бэлэҕи оҥордо. Билигин Виктория Андреевна Данилова невропатолог бырааһынан Дьокуускайга үлэлиир.

https://t.me/sakhasire20/60498?single

Дьэ, ити курдук, Мэҥэ Хаҥалас улууһун Р.А. Бурнашов аатынан Табаҕа орто  оскуолатыгар киһи дууһатыгар үйэ тухары иҥэн хаалар бэртээхэй тэрээһин буолан ааста.