Табаҕаҕа оҕо ускуустубатын оскуолата арылынна

«Култуура» национальнай бырайыак иитинэн? Табаҕаҕа оҕо ускуустубатын оскуолатыгар хапытаалынай өрөмүөн ыытылынна. Оттон бүгүн оскуоланы арыйыы үөрүүлээх тэрээһинигэр СӨ Култуураҕа уонна духуобунай сайдыыга миниистирэ Юрий Куприянов сырытта диэн тустаах министиэристибэ пресс-сулууспатыттан иһитиннэрэллэр. Тэрээһиҥҥэ оскуола иитиллээччилэрэ, педагогтар, төрөппүттэр, сэлиэнньэ олохтоохторо, өрөспүүбүлүкэ ускуустубаҕа оскуолаларын салайааччылара, Дьокуускай куорат баһылыгын солбуйааччы Владимир Аржаков кыттыыны ыллылар.

Култуура миниистирэ Юрий Куприянов иһитиннэрбитинэн,  национальнай бырайыак чэрчитинэн хапытаалынай өрөмүөҥҥэ 8,2 мөл.солк. үп көрүллүбүт, ол иһигэр федеральнай уонна өрөспүүбүлүкэ бүддьүөтүттэн.

— Быйыл, Саха АССР 100 сылынан, РФ култуураҕа министиэристибэтэ  бырайыактыыр-сметнай докумуоннаах бырайыактарбытын барытын өйөөтө. Ол курдук, ускуустуба 10 оскуолатын өрөмүөннүүргэ 86 мөл.солк. кэриҥэ үп көрүллүбүтэ. Бу өрөспүүбүлүкэ салалтатын, муниципальнай үөрэх кыһаларын кытта бииргэ үлэлээһин түмүгүнэн ситиһилиннэ. Бары оскуолалар 2019 сылтан бырайыактыыр-сметнай докумуоннарын оҥорууга тиһиктээхтик үлэлэһэн, судаарыстыба эспэртиисэтин ааһан, бэдэрээччити быһаарыыга куонкурус оҥорон кыһамньыларын уурбуттара. Ускуустуба оскуолалара саҥардыллаллара оҕолорго үчүгэй, усулуобуйа тэриллэр, үлэ-хамнас да тахсыыланар. Манна бүгүн 70-тан тахса оҕо муусука күнэ буолаары турдаҕына үөрэх дьылын саҕалыыллара, ураты бэлиэ түгэнинэн буолар. Былааннанарынан, өссө, сэтинньигэ Эдьигээҥҥэ, Чокурдаахха уонна Черскэйгэ ускуустуба оскуолалара үлэҕэ киирэн дьону-сэргэни үөрдүөхтэрэ. Ити курдук, кэлэр 2023  сылга бу хайысхаҕа үлэ салҕаныа, — диэн этэр миниистир.

Дохсун ытыс тыаһыгар доҕуһуоллатан, миниистир Ил Түмэн уонна СӨ Култуураҕа уонна духуобунай сайдыыга министиэристибэтин бочуотунай грамоталарын»Капитал М» ХЭУо генеральнай дириэктэригэр Владислав Ильиҥҥэ туттарда.

Дьиэ уопсай иэнэ 390 кв. м. тахса, итинтэн 200 кв.м. кэриҥэ — үөрэх ыытыллар сирэ. Акылаат уларытыллыбыт, муоста оҥоһуллубут, кирилиэс тутуллубут, уутун хачайдаан, саҥа түннүктэри олордон, улахан үлэ ыытыллыбыт. Сайын бүтүүтүгэр дьиэ иһэ бэлэм буолбут, оскуола таһынааҕы сирэ-уота тупсарыллыбыт.

Бу 1976 сыллааҕы тутуу. Урут бу дьиэ тыа кулууба, оҕо саада, «Книгочей» бибилэтиэкэ буола сылдьыбыт. Оттон Дьокуускай куораттааҕы оҕо муусукаҕа оскуолатыгар 1990 сыллаахха бэриллибит. Билигин манна 73 оҕо үөрэнэр. Фортепиано отделениетыгар — 8, норуодунай үстүрүмүөннэргэ – 18, үҥкүүгэ – 30, уруһуйга – 17 оҕо дьарыктанар.

Бэлиэтээн эттэххэ, Саха сиригэр 2022 сылга «Култуура» национальнай бырайыак иитинэн  10 ускуустуба оскуолатыгар өрөмүөн ыытыллар. Бу сыалга-сорукка федеральнай, өрөспүүбүлүкэ уонна улуус бүддьүөтүттэн 86 мөл.солк. көрүллүбүт. Маны сэргэ, көрүллүбүт 23,6  мөл.солк., тыа сиригэр алта култуура-сынньалаҥ киинигэр хапытаалынай өрөмүөннэр ыытыллаллар.

СӨ Култуураҕа уонна духуобунай сайдыыга министиэристибэтин пресс-сулууспата.

Хаартыскаларга Наталия Чемашкина түһэриитэ.