Табаҕы быраҕыан баҕалаахтарга үгүстэригэр эбии өйөбүл наада

Статистика көрдөрөрүнэн,  аҥаардас  дьулуур күүһүнэн дьон 15-20 % эрэ  бырыһыана табаҕын  олохтоохтук быраҕар. Үгүстэргэ эбии көмө ирдэниллэр.

Наркология өрөспүүбүлүкэтээҕи диспансерын  килиниичэскэй психолога Анна Заровняева  табаҕы быраҕар кэмҥэ хос төлө барбат туһугар сүбэлэри биэрэр:

«Табаҕы быраҕар санааны уонна ол туругу  мүччү тутуу (срыв) диэн тугуй? Бу – киһи уйулҕатын ыарахан туруга. Ол туохха тириэрдиэн сөбүй?

— тулуйбакка төлө барыан сөп, ити ыарахан туругу бэйэтэ эрэ аһарынара уустук;

-чугас дьонун кытары кыыһырсыан сөп;

— үлэтигэр кыһалҕалары үөскэтиэн сөп;

— чугас дьоно итэҕэйиэ суохтарын сөп;

— болҕомто уонна өйөбүл суох буолуон сөп.

Кини итинник ыарахан турукка киирбитин туохтан билиэххэ сөбүй?

— хараастара сирэйигэр-хараҕар биллэр;

— тугу да сэҥээрбэт буолар;

— санаата тууйуллар;

— олус кыыһырамтаҕай буолар;

— утуйар уута ыһыллар, аһыыр баҕата сүтэр;

— баар кыһалҕаны быһаарартан куотуна сатыыр;

— бэйэтигэр бүгэр.

Табаҕы быраҕарга холонор кэми мүччү туппат туһугар тугу гыныахха?

— успуордунан дьарыктаныы, эт-сиин күүһүн эрэйэр үлэ;

— үчүгэйдик утуйуу, күннээҕи эрэһиими тутуһуу;

— минньигэс, элбэх калорийдаах аһылык;

— оҕолору кытары бииргэ оонньооһун¸ыраас салгыҥҥа күүлэйдээһин, маҕаһыыннарга сылдьыы, сынньалаҥы сөптөөхтүк тэрийии;

— чугас дьоҥҥун, биир санаалаахтаргын кытары алтыһыы;

— медитация, бэйэҥ ис туруккун хонтуруолланар күннүк сурунуу, бэйэни анаалыстаныы;

— психолог өйөбүлэ.