Табаһыттар сийиэстэрэ чугаһаата

Кулун тутар 18-20 күннэригэр Дьокуускайга табаһыттар  IV сийиэстэрэ ыытыллаары турар. Иһитиннэрбиттэринэн, 20 улуустан 250 кэриҥэ дэлэгээт мустуохтаах.

Маны сэргэ, бу далааһыннаах тэрээһиҥҥэ дойду эрэгийиэннэриттэн, Кытайтан, Монголияттан кыттыахтара. Далааһыннаах тэрээһиҥҥэ бэлэмнии хайдах баран иһэрин туһунан бүгүн СӨ Бырабыыталыстыбатын Бэрэссэдээтэлин солбуйааччы Сергей Местниковка ыытыллыбыт мунньахха көрдүлэр.

Бэрэссэдээтэли солбуйааччы манна мустубут дьоҥҥо туһаайан, сүрүн болҕомтону дьыалабыай бырагыраамаҕа уурарга эттэ. Онно пленарнай мунньах, «Северное домашнее оленеводство во второй четверти XXI века» төгүрүк остуол, сэминээрдэр ыытыллыахтаахтар. Дьүүллэһиигэ сүрүн тиэмэлэринэн — үгэс буолбут олох укулаатын оннунан хаалларыы, ыччаты таба иитиитигэр угуйуу уо.д.а. боппуруостар буолаллар.

Сийиэс иитинэн Василий Михайлович Кладкин аатынан СӨ Судаарыстыбаннай бириэмийэтин туттарыахтара.
Маны таһынан, дэлэгээттэр Арктикатааҕы агротехнологическай университекка квалификацияны үрдэтэр кылгас болдьохтоох кууруска сылдьыахтара. Кинилэргэ анаан уопсастыбаннай доруобуйа уонна мэдиссиинискэй профилактика киинигэр доруобуйаларын туругун көрүү тэриллиэ.  Өрүү буоларын курдук, Дьокуускай кэрэ миэстэлэринэн экскурсиялар ыытыллыахтара. «Кочевая семья» өрөспүүбүлүкэтээҕи куонкурус буолуоҕа.

Табаһыттар күрэхтэһиилэрэ, маамыктаны быраҕыы, эстэпиэтэ, о.д.а. болҕомтону тардар күрэхтэһиилэр күүтэллэр. Күөн күрэскэ 14 улуустан хамаандалар кыттыахтара. Сүрүн тэрээһиннэр Сайсарыга кулун тутар 20 күнүгэр буолуохтаахтар. Кыайыылаах хамаандаҕа сүрүн бириис туттарыллыа, бу АЛРОСА хампаанньаттан «Урал» массыына.

Онтон кулун тутар 21 күнүгэр А.Е.Кулаковскай аатынан норуоттар доҕордоһууларын дьиэтигэр улахан кэнсиэр былааннанар. Манна күрэхтэһиилэр, куонкурустар түмүктэринэн наҕараадалары туттарыахтара.

Тэрээһини СӨ тыа хаһаайыстыбатын уонна ас-үөл бэлиитикэтин министиэристибэтэ, СӨ Арктиканы сайыннарыы уонна Хоту дойду норуоттарын дьыалаларын министиэристибэтэ тэрийэллэр.

Санатан эттэххэ, табаһыттар өрөспүүбүлүкэтээҕи  III сийиэстэрэ 2017 сыллаахха ыытыллыбыта.

Сиһилии https://www.sakha.gov.ru/news/front/view/id/3484661  манна көрүөххэ сөп.

СӨ Ил Дарханын уонна Бырабыыталыстыбатын пресс-сулууспата