Табалаах уһуйааныгар оҕолору эбээн норуотун төрүт үгэстэригэр тирэҕирэн иитэллэр

Дьааҥы улууhугар Табалаахха оҕо уhуйааныгар «Аҕыйах ахсааннаах хотугу норуоттар үгэстэригэр уhуйуу — төрөөбүт дойдуга бэриниилээх гражданнары иитии төрүттэрэ» улуустааҕы сэминээр буолан ааста.

Сэминээргэ 3 уhуйаантан 8 иитээччи уонна үөрэҕирии салаатын сүрүн исписэлииһэ Старостина Л.Х. кэлэн кытыннылар. Табалаах уһуйааныгар «Оскуола иннинээҕи улахан саастаах оҕолору эбээн норуотун култууратыгар уонна үгэстэригэр уhуйуу» бырайыак 2022 сылтан хайдах үлэлии турарын көрдүлэр, бырайыак ааптардарынан сэбиэдиссэй Стручкова М.В. уонна иитээччи Захарова Л.Г. буолаллар.

Тэрээhин киэҥ ис хоhоонноох, ол курдук маҥнайгы чааhыгар — улахан уонна бэлэмнэнии бөлөхтөргө иитээччилэр Чирикова С.И., Стручкова С.И. дьарыктаныылары ыыттылар. Төрөппүттэр уонна уһуйаан үлэhиттэрэ оҥорбут эбээннии оонньуурдарын, илии оҥоhуктарынан быыстапканы Семенова М.Г. көрдөрдө, кэпсээтэ. Музыкальнай салайааччы Аммосова М.Н., иитээччи Титова М.В. тэрийиилэринэн оҕолор эбээннии хоhооннору, ырыалары, үҥкүүлэри толорон, кэлбит ыалдьыттары эҕэрдэлээтилэр. Ол кэннэ иитээччи Титова М.В. оҕолорго эбээннии спортивнай оонньуулары хайдах үөрэтэринэн маастар-кылаас көрдөрдө . Уhуйаан иhинэн тэриллибит «Орончикан» мини-түмэли  иитээччи Чирикова С.И. билиhиннэрдэ. Прудецкая Л.А. “Эбээн норуотун куукунатын бүлүүдэлэрин» кэпсээтэ.

Эбиэттэн киэhэ сэминээр иккис чааhыгар «Хотугу норуоттар тустарынан оскуола иннинээҕи саастаах оҕолорго үөрэтии» тиэмэ тула кэпсэтиhии саҕаланна. Бастаан аhаҕас дьарыктары ырытыы, санаа атастаhыыта буолла. Сэбиэдиссэй Стручкова М.В. Табалаах уhуйаанын бырайыагын үлэтин туhунан кэпсээтэ. Сэминээр чэрчитинэн ыытыллыбыт куонкуруска «Мин төрөөбүт Хоту дойдум» лэпбук көмүскээhинэ, бэйэ оҥоруу музыкальнай инструменнарга маастар-кылаас ыытылынна.

Киэhэ Табалаах уhуйаанын кэлэктиибин, ыалдьыттарын, музыкальнай оскуола, кулууп үлэhиттэрин көмөтүнэн  кэнсиэр буолла. Ол кэнниттэн итии чэйдээх остуол тула олорон санааларын үллэһиннилэр.

Л.А. Стручкова, Баатаҕайдааҕы 5 №-дээх уhуйаан  иитээччитэ: “Сэминээр үрдүк таhымнаахтык ааста. Элбэҕи биллим, эбинним. Оҕолору эбээн норуотун үгэстэригэр, култууратыгар уhуйуу үлэтэ ситимнээхтик ыытыллара көстөр”, — диэтэ.

Кэлбит ыалдьыттар оскуола иннинээҕи саастаах оҕолорго эбээн норуотун үгэстэрин, култууратын үөрэтии үлэтэ ситимнээхтик ыытылларын бэлиэтээтилэр, сэминээр үлэтин үрдүк таhымнааҕынан сыаналаатылар.