«Таһаҕаһы хоту тиэйии туһунан» федеральнай сокуон суолтата

2021 сыл алтынньытыгар таһаҕаһы хоту тиэйии үлэтигэр улахан харгыс тахса сылдьыбыттаах. Бу кыһалҕа Саха сиригэр улаханнык биллибэккэ ааспыта эрээри, Камчатка, Сахалин, Чукотка улахан моһуогу көрсүбүттэрэ.

Петропавловск-Камчатск куоракка тиэйиллэн иһэр тутар матырыйаал кэмигэр тиийбэккэ улахан суолталаах тутуулар – балыыһа уонна оҕо уһуйааннара ситэ тутуллубакка тохтообуттара. Оннооҕор маҕаһыыннарга ас-үөл кырыымчык буолуох курдуга.

Кэнники суоттаан көрүү көрдөрбүтүнэн, ол сезоҥҥа Приморье портарыгар уһук эрэгийиэннэргэ тиксэриллиэхтээх 1500 контейнер хааллан турбут. Кытыл терминалларын кыахтара тиийбэккэ сөҕүмэр харгыстаныы үөскээбитэ. Тута тиксэриллиэхтээх таһаҕастар хастыы да нэдиэлэ хойутаабыттара.

Бу кэнниттэн Арассыыйа Бэрэсидьиэнин сорудаҕынан вице-премьер Юрий Трутнев таһаҕаһы хоту тиэйиини сааһылыыр бөлөх салайааччытынан анаммыта, улахан үлэни ыыппыта.

Бу үлэ биир түмүгүнэн федеральнай сокуон барыла оҥоһуллубута. Социальнай суолталаах табаардары Арктика сиригэр-уотугар бастакы уочарат тиксэриини сокуон күүһүнэн бигэргэтии табаары эрэллээхтик уонна кэмигэр тиксэриини хааччыйыахтаах.