Таһырдьа утуйан хаалбыт оҕону быыһаатылар
08.04.2025, 09:00
Хаартыска: СИА архыыбыттан.
Бөлөххө киир:
Ис дьыала министиэристибэтин Алдан оройуонунааҕы отделын дьуһуурунай чааһыгар оҕотун сүтэрбит олохтоох дьахтартан тыллабыр киирбит.
Дьахтар кэпсээбитинэн, 11 саастаах уола кини үлэтигэр сылдьыбыт. Ол кэннэ дьахтар оҕотун таксыынан дьиэтигэр ыыппыт. Киэһэ дьиэтигэр тиийбитэ уола олох да суох эбит. Дьахтар көрдүү сатаабыт да, уолун булбатах.
Инньэ гынан дьуһуурунай чааска тиийбит. Полицейскайдар тута көрдүүр үлэни ыыппыттар. Холуобунай ирдэбил үлэһитэ, полиция лейтенана Уллубек Мусауров уонна учаскуобай, ыстаарсай лейтенант Евгений Лаптуров уол ханна сылдьыан сөбүн чинчийбиттэр.
Сотору буолаат, полицейскайдар оҕо олорор дьиэтиттэн чугас, суол кытыытыгар хаарынан бүрүллүбүт куурканы көрбүттэр. Уллубек Мусауров уонна Евгений Лаптуров хомураҕы хаспыттара арай, оҕо онно утуйа сытар эбит. Уолчаан полицейскайдарга кэпсээбитинэн, таһырдьа уһуннук оонньоон сылайан, хаарга охтон утуйан хаалбыт. Табаарыстара кинини дьиэтигэр барбыт дии санаан эмиэ тарҕаспыттар.
Билигин оҕо доруобуйата этэҥҥэ. Уолчаан ийэтэ полицейскайдарга махтанна.
Сообщить об опечатке
Текст, который будет отправлен нашим редакторам: