“Таһыттан эмтэниэххэ сөп дуо?”

— Уоппускабар Иссык-Кульга сынньана, эмтэнэ барыахпын баҕарабын. Сонотуоруйга таһыттан да сылдьан эмтэниэххэ сөп дуо?

— Таһыттан эмтэниэххэ сөп. Холобура, “Голубой Иссык-Куль” сонотуоруйга таһыттан сылдьан эмтэнээччилэргэ туспа прейскураннаахтар.

“Кинигэҕэ наадыйабын”

— Оттооһуҥҥа аналлаах кинигэлэр бааллар дуо? Оккутун үрдүк сиргэ таһаараргыт ордук буолуо эҥин диэн кэпсииллэр.

Кэбээйиттэн отчут.

Ааҕааччы ыйытыытыгар Арассыыйа Федерациятын үтүөлээх мелиоратора Анатолий Егорович Петров Бүлүү улууһуттан маннык эппиэти ыытта:

— Мин отчуттарга араас кэмнэргэ үгүс сүбэ-ама биэрбитим. Ол түмүгэр “Отчуттарга сүбэ” (1977 с.), “Оттуур сэп-сэбиргэл” (1996 с.), “Ууга, ардахха хайдах оттуохха?” (1999 с.), “Илиинэн оттооһун” (1999 с.), “Ходуһаны тупсарыы, туһаныы” (2002 с.), “Отчут кинигэтэ” (2005 с.) кинигэлэри таһаарбытым. Олохтоох бибилэтиэкэлэргитигэр баара буолуо, ону ааҕан, туһаныҥ!