Таиланд, Анапа, Петербург: ханна сынньана барабыт?

Туроператордар барыллаан чахчыларынан, бу сайын уоппуска кэмигэр Арассыыйа олохтоохторо сынньаналларыгар ордук муора куруортарын талбыттар.

Бу сылга кыраныысса таһыгар сынньанааччылар ортолоругар Турция муоратын кытылыгар туристар муҥутуур 60-ча бырыһыана айаннаабыт. Ол иһигэр омук бастыҥ куруортарыгар Таиланд киирэн биэрдэ. Оттон Арассыыйа иһигэр муора кытыллаах Анапаны уонна Сочины кытары Москва, Санкт-Петербург уонна Казань куораттарын экскурсиялара бастаатылар.

Сайыҥҥы туризм түмүктэрин таһаарар билигин даҕаны эрдэ, ол эрээри тас дойдулар лидердэригэр Турция, Холбоһуктаах Арааб Эмираттара уонна Таиланд таҕыстылар диэн Арассыыйа турооператордарын Ассоциациятын вице-бэрэсидьиэнэ Артур Мурадян иһитиннэрдэ.

«Билигин Турцияҕа сайыҥҥы сезон саҕаланан, сыана кыһыҥҥытааҕар номнуо үрдүк. Холобур, Бодрумҥа тур Аланьятааҕар быдан сыаналаах. Ортотунан от ыйыгар Турцияҕа путевка сыаната 140-160 тыһ. солк. тиийдэ», — диэтэ Артур Мурадян. Бу нэдиэлэ устата икки турист сынньанар сыаната. Оттон атырдьах ыйыгар сыана өссө бүк үрдээн, ортотунан 180-200 тыһ. солк. тиийиэҕэ.

Таилаҥҥа путевка сыаната 160-180 тыһ. солк. сыаналаах эрээри, ол оннугар уон күн сынньанаҕын. Ити да буоллар бу хайысханан турист сырыыта аҕыйах.