Таилантан дойдуларыгар кэлээри бэрэски атыылыыллар үһү

Таилаҥҥа күүлэйдии тиийэн баран рейстэригэр хойутаабыт саха дьоно билиэттэрин атыылаһалларыгар харчылара суох буолан, бэрэски атыылаан эрэллэрин туһунан  сурах социальнай ситимҥэ киэҥник тарҕаммыта. 

Таилантан Дьокуускайга диэри быһа көтөн кэлэр рейс суох. Онон, бастаан Москваҕа диэри көтөллөр, онтон Москваттан Дьокуускайга кэлиэхтээхтэр. Бу сурах социальнай ситимҥэ тарҕаммытыгар кинилэри кириитикэлээһин бөҕө буолбуттар. Онуоха Таилаҥҥа хаайтарбыт  дьонтон  Алексей диэн киһи маннык эппиэттээбит:

«Регистрацияҕа биэс эрэ мүнүүтэ хойутаабыппыт. Таһаҕаспытын  хаалларан баран көтүөхпүтүн, регистрациялыыр ситим сабыллан хаалбыта. Биһиги Oman Air хампаанньанан Маскатка тохтобуллаах көтөн кэлбиппит. Регистрацияҕа хойутааппытын кытта электроннай почтабытыгар Маскат-Москва рейспитин суох оҥорбуттарын туһунан сурук кэлбитэ.»

«КП-Якутия» суруйарынан, СӨ тас сибээстэргэ уонна норуоттар дьыалаларыгар миниистирэ Гаврил Кириллин:

«Ыарахан балаһыанньаҕа түбэспит саха дьоно күн бүгүнүгэр диэри биһиэхэ биллибэтэхтэрэ. Кинилэр уустук балаһыанньаҕа түбэспиттэрин  туһунан биһиги социальнай ситимҥэ ааҕан билбиппит. Бу икки дьиэ кэргэн, уопсайа тоҕус киһи. Дьиэлэригэр бэйэлэрин кыахтарынан тиийэр былааннаахтар.  Маны сэргэ, салгыы Таилаҥҥа сылдьыы уонна виза эҥин боппуруоһун быһаарыы быһаарыллыахтаах», — диэбит.

Миниистир саха дьоно уустук балаһыанньаҕа түбэстилэр да, тута  кинилэр биэдэмистибэлэригэр биллэллэригэр сүбэлээтэ: «Кыраныысса таһыгар күүлэйдииргэ кыра оҕолордоох, аҕам саастаах дьоннордоох буоллахха, болҕомтолоох буолуохха уонна күнү сөпкө былааннаныахха наада «, — диэбит.