Таисия Иванова: «Нерюнгри үөрэнээччилэрэ икки биридимиэти 100 баалга туттардылар»

Нуучча тылыгар биир кэлим эксээмэн түмүгэ билиннэ. Саха сирин 12 үөрэнээччитэ 100 баалга туттарбыт. 

СӨ Үөрэҕин уонна билимин министиэристибэтин Саха сиринээҕи үөрэх хаачыстыбатын кэтээн көрөр киин дириэктэрин солбуйааччы Таисия Иванова иһитиннэрбитинэн, бу Амма, Кэбээйи, Сунтаар, Нерюнгри, Мииринэй улуустарын, Дьокуускай куорат, өрөспүүбүлүкэтээҕи лиссиэй-интэринээт уонна Арктика норуоттар икки ардыларынааҕы оскуола үөрэнээччилэрэ буолаллар.

“Быйыл нуучча тылыгар биир кэлим эксээмэҥҥэ 12 оҕо муҥутуур үрдүк баалы ылла. Манна даҕатан бэлиэтээтэххэ, Нерюнгри 2-с нүөмэрдээх гимназиятын үөрэнээччитэ Илья Манохин уонна Нерюнгри 1-кы нүөмэрдээх гимназиятын үөрэнээччитэ Мария Савкина икки биридимиэти – литэрэтиирэни, нуучча тылын 100 баалга туттардылар. Былырыын нуучча тылыгар сэттэ оҕо 100 баалы ылбыта”, — диэн эттэ. Кэлиҥҥи биэс сылы ылан көрдөххө, нуучча тылын 2021 с. — 8, 2020 — 21, 2019 с. — 8 оҕо 100 баалга туттарбыттара.

Ол курдук, 100 баалы ыллылар:

1. Инесса Адамова (Амма улууһун Майскай орто оскуолата),
2. Сандаара Саввинова (Кэбээйи улууһун Мастаах орто оскуолата),
3. Феврония Саввинова (Сунтаар улууһун Сунтаардааҕы политиэхиньиичэскэй лиссиэй-интэринээт),
4. Полина Корчагина (Мииринэй улууһун Г.А. Кадзов аатынан 23-с нүөмэрдээх оскуолата),
5. Илья Манохин (Нерюнгри улууһун 2-с нүөмэрдээх гимназията),
6. Мария Савкина (Нерюнгри улууһун Нерюнгри 1 нөүмэрдээх гимназията),
7. Иван Спицын (Нерюнгри улууһун 24-с нүөмэрдээх информационнай-тиэхэньиичэскэй лиссиэй),
8. Влада Долженко (Дьокуускай куорат В.И. Малышкин аатынан 23-с нүөмэрдээх оскуолата),
9. Нарияна Кириллина (Дьокуускай куорат лиссиэйэ),
10. Давир Дьяконов (Өрөспүүбүлүкэтээҕи лииссиэй-интэринээт),
11. Сардаана Егинова (Өрөспүүбүлүкэтээҕи лиссиэй-интэринээт),
12. Евдокия Николаева (Арктика норуоттар икки ардыларынааҕы оскуола).