Тайҕаҕа сүппүт эр дьону быыһаатылар (ВИДЕО)

Ахсынньы 20 күнүгэр “Полярные авиалинии” авиахампаанньа Ми-8 бөртөлүөтэ  уонна Александр Евсеев хамандыырдаах, Артур Аргунов иккис пилоттаах, Алексей Васильев бортмеханиктаах экипаж Бүлүү улууһугар быыһыыр-көрдүүр эпэрээссийэҕэ көппүтэ. Сайаапка эрэгийиэннээҕи Быыһыыр сулууспаттан киирбитэ.

Манна биллибитинэн, уон күн анараа өттүгэр алта эр киһи бэйэ оҥоһуга вездеходунан бултуу барбыт. Кинилэр биир нэдиэлэнэн төннүөхтээх этилэр да, сибээскэ тахсыбатахтар. Сиринэн көрдөөһүн туох да түмүгэ суох буолбутун иһин, “Полярнын авиалинии” авиахампаанньа бөртөлүөтүн көрдөспүттэр. Экипаж быыһааччылары кытары Ньурбаттан Бүлүүгэ көтөн баран, икки сирдьити эбии ылан, Арҕаа Салаа диэн сиргэ салгыы көппүттэр. Икки чаас курдук көппүттэр уонна сүппүт дьону Бүлүүттэн 120 килэмиэтирдээх сиргэ булчуттар  үүтээннэриттэн булбуттар.

— Кинилэр биһиги бөртөлүөппүт тыаһын истээт, үүтээнтэн тахсан кэлбиттэрэ. Дьолго, бары этэҥҥэлэр, — диэн хамандыыр Александр Евсеев кэпсээтэ.

Салгыы видео-устууну көрүҥ.