Булуҥ оройуонугар Таймылыырга быйыл аан бастаан бэкээринэлэниэхтэрэ. Бу сылга тутан үлэҕэ киллэрэр былааннаахтар. «Якутоптторг» наадалаах тэрилинэн хааччыйыа. Өрөспүүбүлүкэ салалтата ааспыт сыллааҕы үлэтин отчуоттууругар, итиннэ сорудаҕы СӨ Бырабыыталыстыбатын Бэрэссэдээтэлэ Андрей Тарасенко биэрдэ.
«Таймылыыр олохтоохторо элбэх ыйытыыны биэрдилэр. Олортон биирдэстэринэн аһы-үөлү тиэйиигэ, ол иһигэр бурдук хаачыстыбатыгар туһаайылынна. Итиннэ сыһыаннаах боппуруоһунан «Якутоптторг» дьарыктанар уонна тэрилтэ олохтоохтортон ханнык бурдугу аҕалтарыахтарын баҕаралларыгар этиилэри, сайаапкалары ыларга бэлэм. Маны таһынан, быйыл Ил Дархан Айсен Николаев сорудаҕынан, Булуҥ оройуонугар атыы-логистика киинэ үлэҕэ киллэриллиэхтээх, онон ас-үөл арааһа дэлэйиэ. Өссө, бөһүөлэккэ бэйэлэрэ бэкээринэлэниэхтэрин, олохтоохтор бэйэлэрэ килиэп астаан таһаарыахтарын баҕаралларын туһунан этии киирдэ», — диэтэ Андрей Тарасенко.
«Якутоптторг» саас бэкээринэҕэ оһохтору уонна араас наадалаах тэриллэри аҕалыан сөп. Маныаха бэрэссэдээтэл саҥа бэкээринэҕэ үлэлиир баҕалаах киһи наадатын бэлиэтээтэ.
Ону таһынан, 2023 сылга уустук суоллаах-иистээх оройуоннарга «күөх рейстэр» элбэтиллибиттэр. «Якутоптторг» генеральнай дириэктэрэ Николай Алексеев тэрилтэ ыраах сытар нэһилиэктэргэ тиийэ, ааспыт сыллааҕар 35,3 туоннанан элбэҕи, 102 туоннаҕа тиийэ таһаҕаһы тиэрдэр былаан баарын иһитиннэрдэ.
2023 сылга уопсайа 11 800 туоннаттан тахса социальнай суолталаах ас-үөл, таһаҕас тиэйиллиэ. Бу ааспыт сылы кытта тэҥнээтэххэ 1300 элбэх.
СӨ Ил Дархан уонна Бырабыыталыстыба пресс-сулууспата.