Таксыыс пассажир төлөпүөнүн, харчытын уорбут

Дьокуускайга  оперативниктар пассажиртан  төлөпүөнү уонна харчыны уорууга уорбаланар  киһи ким буоларын быһаардылар. Ол курдук полиция 4-с нүөмэрдээх отделыгар төлөпүөнүн уонна 25 тыһ. солк. уордарбыт дьахтартан сайабылыанньа киирбит.  

Суһал-ирдиир үлэ кэмигэр холуобунай ирдэбил үлэһиттэрэ  уорбаланааччыны — 28 саастаах урут сууттана сылдьыбыт таксыы суоппарын туппуттар.

Быһаарыллыбытынан, эмсэҕэлээччи таксыы өҥөтүнэн туһаммыт. Дьиэтигэр кэлбитэ суотабай төлөпүөнэ суоҕун билбит. Ол кэннэ тута таксыы суоппарыгар эрийэн чопчуласпыт. Суоппар дьахтарга кэлэн, массыына солуонугар төлөпүөнү көрдөөбүттэр уонна булбатахтар. Кэлин эр киһи төлөпүөнү олбох анныгар түспүтүн булбут.  Итиэннэ дьахтарга төнүннэрбэт сыаллаах төлөпүөнтэн мобильнай бааҥҥа киирэн харчыны уорбут. Ол кэннэ төлөпүөнү бырахпыт.

Билигин эр киһиэхэ РФ Холуобунай кодексын 158 ыст. 3 чааһынан холуобунай дьыала көбүтүллүннэ.