«Талба талаан» бырайыак үлэтэ салҕанар

«Айар Кут» Суруйааччылар уонна хоһоонньуттар эрэгийиэннээҕи сойуустарын өйөбүлүнэн, саха тыла, саха саҥата сайдарыгар хомоҕой тылынан суруйар хоһоонньуттар хоһооннорун, суруйааччылар кэпсээннэрин, айар айымньыларын билсиһиннэрэр, ырыаларын ыллаан норуокка иһитиннэрэр «Талба талаан» бырайыак муус устар 23 күнүгэр 7-с төгүлүн дьоҥҥо-сэргэҕэ таһаарылынна.

Бу күн Евдокия Николаевна Уварова-Чуохаана бэйэтэ салайар «Саха сирин айар түмсүүтэ» хоһоонньуттарын хоһооннорун хомуйан, «Дайар дорҕооннор» хомуурунньук уонна бэйэтин хоһооннорунан «Күөрпүн күөртүүбүн», «Сүмэ тыл алыба» диэн кинигэтин холбоон, үс саҥа кинигэ тахсыбытын бэлиэтиир дьоро киэһэ буолан ааста.
Чуохаана салайар түмсүүтүн кыттыылаахтарын кытары дьыл түөрт көрүҥүн өҥүнэн киэргэммит далбардарга арыаллатан, аймаҕа Василий Гаврильевичтыын сэргэстэһэн, сибэкки дьөрбөтүн тутан, сахалыы ырыа доҕуһуоллаах саала ортотунан хааман, бочуоттаах миэстэтигэр олордо. Сүрэҕи сылытар эҕэрдэ тыл эгэлгэтин, долгутар ырыа долгунугар устан сибэкки дьөрбөтүн бэлэх тутан, бу сиргэ үөрүү үрдэлин билэн, бу киэһэ дьоллонно.
Евдокия Николаевна саҥа кинигэтиттэн хомоҕой хоһооннорун биир эйгэлээх доҕотторо доргуччу аахтылар.
«Айар Кут» Суруйааччылар уонна хоһоонньуттар эрэгийиэннээҕи сойуустарын кыттыылаахтара бары тахсан, Чуохаана хоһооннорун кэлбит ыалдьыттарга, доҕотторугар, мустубут биир дойдулаахтарыгар, аймахтарыгар анаан билсиһиннэрдилэр, бэлэх туттаран эҕэрдэлээтилэр, бэйэлэрин ырыаларын ыллаан, тэрээһин тэтимин күүһүртүлэр.
Дьоро киэһэни норуот ырыатын-тойугун тарҕатааччы, «Дьээ-буо» этно-бөлөх салайааччыта Любовь Афанасьевна Каратаева оһуордаах-бичиктээх тылынан киэргэтэн, ыра тыынынан куттаан ыытта.
«Айар Кут» түмсүү кыттыылааҕа Кэкэрдэ Зоя мустубут ыалдьыттары кинигэ күнүнэн эҕэрдэлээн, «Кинигэ айхала» диэн бэйэтин хоһоонун өйтөн аахта уонна бүгүҥҥү түгэн дьоруойун айар талаанын билинэн, «Талба талаан» бырайыак анал бэлиэтин (Символ- кубок) күүстээх ытыс тыаһын ортотугар туттарда, ол кэннэ бэйэтин ырыатынан эҕэрдэлээтэ
СӨ Суруйааччыларын сойууһун чилиэннэрэ Иванова Акулина Михайловна-Бээрийэ кыыһа Хотойук Айгыына, Раиса Егоровна Винокурова, прозаик Валерий Никифоров-Суор Уола бочуоттаах ыалдьыт буоллулар. Чуохаанаҕа айар үлэтин сэргээн, хоһооннорун истэн, сыаналаан, ырыа кутунан тыыннаан, алгыстаах кэс тылларын эттилэр.
Бу дьоро күнү киэргэтэ, эҕэрдэлии кэлбит «Кынаттаах бөрүө» «Иэйии», «Саха сирин айар түмсүүтэ», «Кэрэ эйгэ» түмсүүлэр айар куттаах хоһоонньуттар бары тахсан эҕэрдэлээн, кини хоһооннорун иэйиилээхтик ааҕан, үтүө санааларын биллэрдилэр.
Саха сирин Мелодистарын сойууһун чилиэнэ, ырыаһыт, СӨ култууратын туйгуна Татьяна Бандерова-Татыйаас, СӨ култууратын туйгуна ырыаһыт, тамада Сайылык Бүөтүрэ, СӨ үөрэҕириитин туйгуна Мария Захарова ырыаларынан сэргэхситтилэр
Дьоро күн ыалдьыттарыгар саҥа сүүрээни киллэрэн, Чуохаана күрэх биллэрдэ. Бу күрэх үс көрүҥнээх: пародия, пантомима, ырыа.
Дьүүллүүр сүбэ түмүгүнэн кыайыылаах тахсыбыт бастакы остуол 10 тыһыынча солкуобайы, супер-бирииһи Раиса Винокуроваҕа туттардылар.
Анна Хабарова тойугунан, Кэкэрдэ Зоя ырыатынан, Сергей Семёнов-Сэгэй баайаанынан доҕуһуоллаан ыллаан эҕэрдэлээтилэр, айар үлэтигэр ситиһиилэри баҕардылар.
Бу күн Евдокия Николаевна аймахтара, доҕотторо айар, суруйар дьон хоһооннорун, ырыаларын истэн кэрэхсээн, талааннара сайдан иһэригэр баҕардылар.

Кэкэрдэ Зоя