«Тан» рестобаар үлэтэ 60 хонукка тохтотулунна

Дьокуускай куорат борокуратуурата  СӨ  Борокуратууратын сорудаҕынан, исписэлиистэри кытыннаран, «Тан» рестобаарга бэрэбиэркэни ыытта. Бу туһунан СӨ Борокуратуурата иһитиннэрэр.

Бэрэбиэркэ түмүгүнэн, баһаартан сэрэхтээх буолуу ирдэбиллэрин кэһии, ол иһигэр баһаар кэмигэр дьону эвакуациялыырга сыһыаннаах кэһиилэр тахсыбыттара көһүннүлэр.  Холодильниктарга  күнэ-дьыла уонна болдьоҕо суруллубатах ас-үөл, полуфабрикаттар хараллыбыттара быһаарылынна. Тымныы сыахха уонна бэлэм бородууксуйа сыаҕар  салгыны ыраастыыр, быһар-сотор тэриллэр маркировката уо.д.а. суохтар эбит. Үлэһиттэр мэдиссиинэ киниискэлэрин көрдөрбөтөхтөр.
Борокуратуура этиитинэн, «Восточный ветер» ХЭТ юридическай сирэйгэ РФ Административнай кодексатын 20.4 ыст. 1 чааһынан (баһаартан сэрэхтээх буолуу ирдэбиллэрин кэһии), 6.6 ыстатыйатынан административнай дьыалалары тэрийдэ.

Түмүгэр юридическай сирэй РФ Административнай кодексатын 20.4 ыст. 1 ч. административнай эппиэккэ тардылынна уонна 300 тыһ. солк. ыстарааптанна. Дьокуускайдааҕы куорат суутун атырдьах ыйын 22 күнүнээҕи быһаарыытынан, түүҥҥү кулууп үлэтэ 60 хонукка тохтотуллубут.
Суут быһаарыыта сокуоннай күүһүгэр киирэ илик.