«Таптаһар сүрэхтэр үҥкүүлэрэ»

 С.Зверев-Кыыл Уолун аатынан Үҥкүү национальнай тыйаатыра кулун тутар 31 күнүгэр  балет артыыстара, кэргэннии Саскылаана уонна Эдуард Жирковтар айар биэчэрдэрин көрөөччүгэ бэлэхтиэҕэ.

Жирковтар “Сэргэлээх уоттара” Култуура киинигэр ыытыллар “Таптаһар сүрэхтэр үҥкүүлэрэ”  (“Танец любящих сердец”)   айар биэчэрдэрэ   Арассыыйа Федерациятыгар Дьиэ кэргэн, Саха Өрөспүүбүлүкэтигэр Оҕо саас сылларыгар ананар.

Эдэр, талааннаах, талан ылбыт идэлэрин олус сөбүлүүр Сааскылаана уонна Эдуард Жирковтар  репертуардара сылтан сыл аайы сонун үҥкүүнэн, уобараһынан уонна оруолларынан байытыллар.

Кинилэр айар биэчэрдэрин бырагырааматыгар Георгий Ковтун, Долаана Федотова, Светланы Бессонова, Дора Филиппова уонна  Геннадий Баишев туруоруулара киирдилэр. Ону сэргэ Эдуард бэйэтэ айбыт үс саҥа үҥкүүтүн бэлэхтиэҕэ.

Бу күн эстрада ырыаһыттара Саарын,  Айгылаан, хомусчут В.Шарина, «Кыл Саха» ансаамбыл, балет оскуолатын иитиллээччилэрэ кыттыахтара.

Чурапчы улууһуттан төрүттээх Саскылаана Аркадьевна Жиркова (Аржакова) 2015 сыллаахха Аксения уонна Наталья Посельскаялар ааттарынан хореография кэллиэһин бүтэрбитэ. Ити сыл Үҥкүү национальнай тыйаатырын үҥкүү бөлөҕөр ылыллыбыта. Сааскылаана бэйэтин чаҕылхай талаанын көрдөрөн, тута сүрүн састаапка киирбитэ, кылгас кэм иһигэр  кэнсиэр нүөмэрдэрин үөрэппитэ.

Эдуард Жирков – балет солиһа, “Саха” НКИХ “Үҥкүүлээ”  өрөспүүбүлүкэтээҕи тэлэбиисэринэн куонкуруһун,  «MUUSустар» ыччат бэстибээлин “Бастыҥ хореограф” номинана.

Кини А.Д.Макарова аатынан култуура уонна ускуустуба кэллиэһин хореографияҕа отделениетын ситиһиилээхтик бүтэрэн баран, 2016 сыллаахха балет артыыһынан ылыллыбыта. Эдэр артыыс олус эппиэтинэстээх,  олус үлэһит. Хамаандаҕа үлэлиирин сатыыр, үҥкүүгэ үөрүйэхтэрин сайыннарар,  туруорааччы талааннаах, саҥаны түргэнник ылынарга хорсун майгылаах.

Манна даҕатан эттэххэ, Саха сирин норуодунай артыыһа Дмитрий Артемьев 60 сааһыгар анаммыт “Бохсуруйуу” этнобалеты көрдөрүү күнүгэр бэйэтин тапталлаах оруолун – Сээнэгэй диэн ааттаах эдэр ойуун оруолун Эдуард Жирковка туттарбыта. Эдуард Жирков эдэр ойуун уобараһын көрөөччүгэ сүүс бырыһыан тириэрдэн,  айар үлэтигэр өссө биир үрдүк чыпчаалга тахсыбыта.

Саскылаана уонна Эдуард айар үлэлэригэр куруук туох эрэ саҥаны көрдүүллэр. Эдуард хорсуннук туруорар, онтон Саскылаана эмиэ саҥа сүүрээни киллэрэр. Этэргэ дылы, кинилэр иккиэн биир долгуҥҥа сылдьаллар. Кинилэри бэйэ-бэйэлэригэр тапталлара эрэ буолбакка, үҥкүүнэн үлүһүйүүлэрэ холбуур. Саскылаана уонна Эдуард Жирковтар Эрнест диэн уолчааннарын улаатыннараллар. Кэргэннии үҥкүүһүт Жирковтар ситиһиилэрин уонна көрөөччү билиниитин кистэлэҥэ  олус үлэһиттэригэр, талааннарыгар, тапталларыгар уонна бэйэ бэйэлэригэр итэҕэйсиилэригэр сытар.

Вера ЧЕРНОГРАДСКАЯ