Хартыска: тыйаатыр архыыбыттан
Платон Алексеевич Ойуунускай аатынан Саха тыйаатыра 95 сыла туоларынан, алтынньы 17 күнүгэр Анемподист Иванович Софронов “Таптал” дыраамата турбута.
Руслан Тараховскай испэктээги мюзиклга чугас гынан туруорбут буолан, артыыстар элбэхтик ыллаатылар.
Айымньыга батталлаах хараҥа үйэ саҕанааҕы дьахтар дьылҕата көстөр. Кэтириис, аймах оҕонньоругар иитиллибит, тулаайах кыыс, үйэтин тухары хамначчыт курдук үлэлээн улааппыт. Ситэр-хотор кэмэ кэлбитин кэннэ баайга-дуолга ымсыыран, Сис Сэмэнэ диэн хас да ойоҕун көмпүт, кырдьаҕас баай киһиэхэ атыылыыллар. Кэтириис кэргэн тахсан баран да, хамначчыт курдук кырбана, атаҕастана сылдьарыттан кыһыйан, сылайан таптыыр киһитэ Бүөтүрдүүн күрүүргэ быһаарынар. Бүөтүр үөрэхтээх буолан, Кэтирииһи суут-сокуон көмөтүнэн эриттэн араараары куораттаабыт кэмигэр булан ылаллар. Кэтириис Бүөтүрүн күүтэ сытан олохтон күрэнэр.
Испэктээк ааптар айымньытыттан улахан уратыта суох. Сыанаҕа оонньонор буолан, билгэһит тыыраахылары, иэйэхсити көрүөхпүтүн сөп. Кинилэр араас дьүһүннээх салбырҕастаах, ойуун кыырар таҥаһыгар маарынныыр, маҥан таҥастаахтар. Ити, мин санаабар, уус-уран деталь буолар. Кэтириис Бүөтүрү кытта күрүүрүгэр иэйэхситтэр дьылҕатын быатын төлө тутан кэбиһэллэр, кыыһы төннөрөөрү эрийэ сатаабыттара быстан хаалар. Онтон айымньы түмүгэр Кэтирииһи ити быанан баҕанаҕа баайаллар.
Артыыстар бэйэлэрин оруолларыгар олус барсаллар, итэҕэтиилээхтик оонньууллар. Саамай биһирээн көрбүт уобараһым Күлүк Сүөдэр буолар. Кини оруолун Александр Борисов толорор. Сүөдэр эмиэ араас өҥнөөх салбырҕастаах маҥан таҥастаах, онон көрөөччү кини резонер уобарас буоларын тута өйдүүр. Александр Борисов туспа, киһини абылыыр куоластаах буолан, Сүөдэр ыллыырын, олоҥхолуурун көрөөччү сэргиир. Ону таһынан, мин санаабар, Сүөдэр испэктээк тухары сыҥаһаҕа олорон баран бүтүүтэ турара сүрдээх күүстээх, киһи кутун тутар түгэн. Ити түгэни Александр Борисов итэҕэтиилээхтик, киһини долгутардык көрдөрөр.
Түмүктээн эттэххэ, Руслан Тараховскай туруоруутугар испэктээк саҥа өҥнөрүнэн оонньообут, олус интэриэһинэй, киһи кутун ордук тутар буолбут. Кини ааптар айымньытын уларыппакка эрэ, эбэн, киэргэтэн арыйбыта олус үчүгэй.
Людмира АЛЕКСЕЕВА
Бырабыыталыстыба бэрэссэдээтэлин солбуйааччы Георгий Степанов салайааччылаах өрөспүүбүлүкэ социальнай салаатын салайааччылара сыл аайы ыытыллар «Үтүө санаа…
Амматааҕы полиция дьуһуурунай чааһыгар олохтоох киһи массыынатын уоттуу сатаабыттарын туһунан иһитиннэрбит. Эр киһи быһаарбытынан, дьиэтин…
Дьокуускай куорат мээрэ Евгений Григорьев пресс-кэмпириэнсийэ кэмигэр суруналыыстар киин куоракка сылы эргиччи үлэлиир итии былаһааккалары…
Төрөөбүт тыллары харыстыыр уонна сайыннарар судаарыстыбаннай бырагыраама чэрчитинэн, 2026 сылтан саҕалаан, муниципальнай бибилэтиэкэлэргэ оҕо төрөөбүт…
Дьокуускайга Бүлүүлүүр суолга баар сыбаалка билигин да умайа турар. Уоту умуруорар үлэ ыытыллар диэн киин…
Бүгүн Дьокуускай куоракка Опера уонна балет тыйаатырын дьиэтигэр өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III…